बाहिर गोरो तर भित्र कालो छ नेताज्यू ।
जता गएपनि त तिम्रै जालो छ नेताज्यू ।।
नपत्याए हेरौं त आफ्नै वरिपरि देखिन्छ
स्वकिय सचिव त तिम्रै सालो छ नेताज्यू ।।
सहयोग गर्नु है भ्रष्टाचारिलाई यसपाली
मन्त्री बन्ने त अब तिम्रै पालो छ नेताज्यू ।।
धोयौ रे सफा पारेर बलत्कारी र हत्यारा
अस्तिको तिम्रो कर्तुत आलो छ नेताज्यू ।।
अब के गर्दैछौ भन्ने पनि प्रष्टै छ सबैलाई
हिङ्ग छैन के त हिङ्गको टालो छ नेताज्यू ।।
अब किन डराउनु जाबा जनताहरु सँग
भ्रष्टाचारीहरु सँग हाते-मालो छ नेताज्यू ।।
-राम भण्डारी
सिन्धुपाल्चोक
हालः काठमाडाैं
