Sunday 22nd November 2026

कविता : “म रोपाहार हुँ” -रचना मोक्तान ‘यात्री’


कविता : “म रोपाहार हुँ”

पहाडका थुम्काहरूले
वर्षा ऋतुको रिमझिम बहारलाई
धर्ती भिज्ने गरी खन्याएपछि
आँखामा बिहान मिचेर
कानमा भालेको अलाराम सँगै
परेलीमा घाम जन्माउने रोपाहार हुँ म ।

चूल्ठोमा ईन्द्रकमल सिउरेर
कम्मरमा गुन्युको सप्को लगाउँदै
संगीनिको ओठ सँगै चाहना सुसेलेर
घुमको पछ्यौरीले कपाल ढाक्दै
खुट्टामा बाटो हिंडाउने रोपाहार हुँ म ।।

हली दाई र बाउसे दाईले
गह्राका उबडखाबड हरु सम्याएपछि
राता चुराहरुको छनछनी संगीतमा
दबदबे हिलो भित्र हत्केला बजाउँदै
हरिया बीऊहरुको असारे लय रोपेर
पिठ्युँमा बतासको खुई कडाउने रोपाहार हुँ म ।।।

मानो खाएर मूरी उमार्ने समयमा
लाग्ने गर्छ किसान महोत्सव
निधारमा माटोको टीका
र शिरमा बीउको जमरा टाँसेर
कुलोको पानीले जवानी भिजाउँदै
दुःखको पटुकीले पेट बाँध्ने रोपाहार हुँ म ।।।।

हृदयको एउटा कुनामा वेदना लुकाएर
आँखाका क्षितिजमा खुशीको लाली पोत्दै
सुनको बाला मा धान झुलाएर
मनको खलामा यौवन फुलाएर
सुनौलो मंसिर पर्खिरहेकी रोपाहार हुँ म ।।।।।

बेठीमा बजेको पञ्चेबाजा सँगै
मंसिर पर्खिरहेकी रोपाहार हुँ म ।।।।।।

✍️रचना मोक्तान “यात्री”
१५ असार २०७७


सम्बन्धित शीर्षकहरु

लन्डन, नोभेम्बर २१। विश्वकै घातक र उपचार गर्न कठिन मानिने अग्न्याशय (प्यान्क्रियाज) को क्यान्सर उपचारमा वैज्ञानिकहरूले नयाँ आशाजनक उपलब्धि हासिल…

बङ्गलादेशको नाराइल जिल्लामा प्रतिबन्धित अवामी लिगका कार्यकर्ताले गरेको भनिएको आक्रमणमा बङ्गलादेश नेसनलिस्ट पार्टी (बीएनपी) का दुई स्थानीय नेताको हत्या भएको…

म्यानमारको सेनाले रोहिंग्या मुस्लिम समुदायमाथि सन् २०१७ मा गरेको सैन्य दमनलाई नरसंहार ठहर गर्दै अन्तर्राष्ट्रिय न्यायालय (आईसीजे) ले ऐतिहासिक फैसला…

प्रतिकृयाहरू
...