तितोपाटी- राप्रपा अध्यक्ष कमल थापाले धर्म ,संस्कृति र पहिचान रक्षाको निमित्त पार्टीगत राजनीति भन्दा माथि उठेर सबै एक ठाउँमा उभिनु पर्नेमा जोड दिएका छन् । मकवानपुरको थाहा नगरपालिकास्थित फाँट बजारमा आयोजित सप्ताह ज्ञान महायज्ञको समापन समारोहलाई सम्बोधन गर्दै अध्यक्ष थापाले सो कुरा बताएका हुन् ।
कार्यक्रममा बोल्दै अध्यक्ष थापाले बढ्दो धर्म परिवर्तनलाई रोक्न नसके समस्या उत्पन्न हुने तर्फ सबैलाई सचेत हुन आग्रह गरे । समय क्रममा सरकार परिवर्तन हुने, व्यवस्था परिवर्तन हुने तर प्रकृतिको नियम परिवर्तन नहुने भन्दै अध्यक्ष थापाले आफ्नो धर्म, संस्कृतिमाथि भइरहेको अतिक्रमण र प्रहार कुनै पनि स्वाभिमानी नेपालिले टुलुटुलु हेरेर बस्न नहुने बताए।
विश्वकै जेठो ,सम्पन्न र प्रभावशाली सनातन मान्यतालाई कमजोर पार्न भईरहेको षडयन्त्रलाई चिर्न युवा पुस्ता अग्रसर हुनुपर्ने आवश्यकता औल्याए । विश्वका कुनै पनि देशले आफ्नो धर्म, पहिचान र मूल्य मान्यतालाई कमजोर बनाएर प्रगती गर्न नसक्ने ठोकुवा गर्दै थापाले हामिले पुर्खाले दिएको धन सम्पतीको मात्र चिन्ता र रक्षा गर्ने नभई सस्कार र सस्कृतिको पनि रक्षा गर्नुपर्ने बताए ।
सो अवसरमा राप्रपा धर्म संस्कृति समन्वय विभाग प्रमुख पुष्पराज पुरुष थाहा नगर उपप्रमुख खड्ग गोपाली, बिष्णु ढकाल लगायतले बोलेका थिए । यसै बीच राप्रपा थाहा नगर समितिद्वारा आजै आयोजित कार्यकर्ता भेटघाट कार्यक्रममा बोल्दै थापाले नयाँ ढङ्गबाट संगठन निर्माणमा जुट्न कार्यकर्तालाई निर्देशन दिए ।
चुनावी हारजित स्वभाभिक प्रक्रिया भएकोले त्यसको समिक्षा गर्दै उच्च मनोबलका साथ अघि बढ्नु पर्नेमा थापाको जोड थियो । सो अबसरमा राप्रपा सहायक महामन्त्री राजाराम बर्तौला, प्रवास विभाग प्रमुख विजय खड्का , जनजाति नेता राम थोकर, हरेराम कार्की, राम बहादुर घले, सुरेन्द्र तामाङ लगायतको उपस्थिती थियो ।
