फ्रान्सभरका उच्च माध्यमिक विद्यालयका विद्यार्थीहरूले शिक्षा क्षेत्रको कमजोर अवस्था र सरकारी बजेटको विरोधमा प्रदर्शन गरिरहेका छन्। प्रदर्शनका क्रममा विद्यालयमा आगजनी, तोडफोड र प्रहरीसँग झडप भएका छन्।
पछिल्लो केही दिनमा ६२५ जनाभन्दा बढीलाई प्रहरीले नियन्त्रणमा लिएको छ भने ८३ जना प्रहरी र १५९ जना विद्यार्थी तथा शिक्षक घाइते भएका छन्। केही विद्यालयमा विद्यार्थीहरूले अवरोध खडा गर्दै फोहोरका डस्टबिनमा आगो लगाएका छन्।
विद्यार्थीहरूले विद्यालयमा शिक्षकको अभाव, जीर्ण भवन, सरसफाइको कमजोर अवस्था र पर्याप्त सुविधा नहुँदा आन्दोलनमा उत्रिनुपरेको बताएका छन्।
राष्ट्रपति इमानुएल म्याक्रोनले विद्यार्थीहरूको चिन्ता जायज भए पनि हिंसा स्वीकार्य नभएको बताएका छन्। सरकारले अवस्था नियन्त्रणका लागि आपत्कालीन बैठक बोलाएको छ।
