साउदी अरब नेतृत्वको गठबन्धनले यमनका हुथी विद्रोहीले मदिनाको एक विद्युत् केन्द्रमा ड्रोन आक्रमण गरेको आरोप लगाएको छ। साउदी अरब नेतृत्वको गठबन्धनले यमनका हुथी विद्रोहीले मदिना सहरको एक विद्युत् वितरण केन्द्रमा ड्रोन आक्रमण गरे पनि उक्त आक्रमणबाट एक ट्रान्सफर्मरमा मात्रै क्षति पुगेको र विद्युत् सेवा प्रभावित नभएको बताइएको छ।
गठबन्धनका अनुसार उक्त केन्द्रबाट मस्जिद-ए-नबवी मा विद्युत् आपूर्ति हुने गर्छ। साउदी पक्षले मुस्लिमहरूको आस्था माथि प्रहार गर्ने उद्देश्यले आक्रमण गरिएको आरोप लगाएको छ।
तर हुथी पक्षले आरोप अस्वीकार गर्दै त्यसलाई झुटो भएको जनाएको छ।
यसैबीच यमनको ताइज क्षेत्रमा सरकारी सेना र हुथी विद्रोहीबीच भीषण लडाइँ भएको छ। सरकारी सेनाले दर्जनौँ हुथी लडाकु मारिएको दाबी गरेको छ।
युद्धका कारण यमनमा विस्थापितको संख्या बढ्दै गएको छ। प्रभावितलाई सहयोग गर्न साउदी अरबले यमन सरकारलाई करिब ६ करोड अमेरिकी डलर बराबरको आर्थिक सहायता दिने घोषणा गरेको छ।
