सप्तकोशी नदीमा आएको बाढीका कारण सप्तरीको तिलाठी कोइलाडी गाउँपालिका र हनुमाननगर कंकालिनी नगरपालिकाका १ सय ५७ घर डुबानमा परेका छन्।
तिलाठी कोइलाडीका १७ घर तथा हनुमाननगर कंकालिनीका १ सय ४० घरमा बाढी पसेपछि स्थानीय बासिन्दा विस्थापित भएका छन्। घरभित्र पानी पसेर खाद्यान्न तथा अन्य सामग्रीमा क्षति पुगेको छ।
बाढी प्रभावित परिवारहरूलाई सुरक्षित स्थानमा सारिएको छ भने स्थानीय तह र सुरक्षा निकायले राहत तथा उद्धारको काम गरिरहेका छन्। बाढीका कारण प्रभावित क्षेत्रमा खानपिन र बसोबासको समस्या बढेको छ।
स्थानीयका अनुसार सप्तकोशी नदीमा पानीको बहाव बढ्नेबित्तिकै यस क्षेत्रमा हरेक वर्ष बाढीको समस्या दोहोरिने गरेको छ।
