अविरल वर्षापछि आएको बाढी र पहिरोका कारण देशका विभिन्न मुख्य सडक अवरुद्ध भएका छन्। पृथ्वी राजमार्ग, मुग्लिन–नारायणगढ सडक, कान्ति लोकपथ र बीपी राजमार्गमा पहिरो खसेपछि सवारी आवागमन प्रभावित भएको छ।
धादिङको कृष्णभीरसहित पृथ्वी राजमार्गका सात स्थानमा पहिरो खसेपछि राजमार्ग पूर्ण रूपमा बन्द गरिएको छ। चितवनको मुग्लिन–नारायणगढ सडकखण्ड पनि अर्को सूचना नआएसम्मका लागि बन्द गरिएको छ।
यस्तै, ललितपुरतर्फ कान्ति लोकपथका विभिन्न स्थानमा पहिरो खसेको छ भने काभ्रेको रोशी क्षेत्रमा पहिरोका कारण बीपी राजमार्ग पनि अवरुद्ध भएको छ।
जोखिम बढेकाले केही सडकमा रातिको समयमा सवारी सञ्चालनमा पनि रोक लगाइएको प्रहरीले जनाएको छ।
