चीनले सांघाई नजिकको समुद्री क्षेत्रबाट एकैपटक ९ वटा उपग्रह सफलतापूर्वक अन्तरिक्षमा प्रक्षेपण गरेको छ।
बुधबार बिहान ग्राभिटी–१ वाई३ रकेटमार्फत प्रक्षेपण गरिएका उपग्रहहरूमा छियानफान स्याटेलाइट समूहका नयाँ उपग्रह र एक प्रविधि परीक्षण उपग्रह समावेश छन्। यो अभियान ताइयुआन स्याटेलाइट प्रक्षेपण केन्द्रले सञ्चालन गरेको थियो।
चिनियाँ कम्पनी ओरियनस्पेसका अनुसार यस प्रक्षेपणले समुद्रबाट हुने चीनको एकल प्रक्षेपणमा सबैभन्दा बढी भार र उच्च कक्षामा उपग्रह पुर्याउने नयाँ कीर्तिमान बनाएको छ।
उपग्रहहरू करिब ८०० किलोमिटर उचाइको कक्षामा स्थापित गरिएको र अभियान पूर्ण रूपमा सफल भएको जनाइएको छ। यसले चीनको व्यावसायिक अन्तरिक्ष कार्यक्रम र स्याटेलाइट इन्टरनेट सञ्जाल विस्तारमा महत्वपूर्ण उपलब्धि हासिल गरेको मानिएको छ।
