इरानको सरकारी सञ्चारमाध्यमका अनुसार आइतबार बिहान हर्मुज जलडमरूमध्यस्थित क़ेश्म टापु नजिक एक इरानी मालवाहक जहाजमाथि आक्रमण हुँदा १ जनाको मृत्यु भएको छ भने ४ जना घाइते भएका छन्। इरानको सरकारी समाचार संस्था आईआरएनएले क़ेश्मका गभर्नरलाई उद्धृत गर्दै आक्रमणमा “आतंकवादी शत्रु” संलग्न रहेको दाबी गरेको छ। घटनाबारे अमेरिकी सेनाले तत्काल कुनै प्रतिक्रिया दिएको छैन।
यसैबीच, बेलायतको समुद्री व्यापार निगरानी निकायले पनि जलडमरूमध्यबाट गुज्रिरहेको अर्को जहाज अज्ञात प्रक्षेपास्त्रबाट प्रभावित भएको जनाएको छ। जहाजमा आगलागी भएपछि यात्रु तथा चालक दलको उद्धार गरिएको छ।
हर्मुज जलडमरूमध्य विश्वको सबैभन्दा महत्वपूर्ण तेल ढुवानी मार्गमध्ये एक हो। यहाँ बढ्दो तनावले अन्तर्राष्ट्रिय जहाजरानी र तेल आपूर्तिमा असर पर्ने चिन्ता बढाएको छ।
घटनाभन्दा केही घण्टाअघि इरानी राष्ट्रपति मसुद पेजेस्कियनले सामाजिक सञ्जालमार्फत “इरान कहिल्यै आत्मसमर्पण गर्दैन” भन्दै देशको अडान दोहोर्याएका थिए। यता, इरान समर्थित हुथी विद्रोहीहरूले रातो समुद्रस्थित बाब अल-मन्देब जलडमरूमध्य क्षेत्रमा पनि आफ्नो प्रभाव बढाइरहेका छन्, जसले क्षेत्रीय सुरक्षा चुनौती थप बढाएको छ।
हर्मुज र बाब अल-मन्देब दुवै विश्वका महत्वपूर्ण समुद्री व्यापार मार्ग हुन्। यी क्षेत्रमा बढ्दो तनावका कारण अन्तर्राष्ट्रिय जहाजरानी र तेल आपूर्तिमा असर पर्ने तथा विश्व बजारमा तेलको मूल्य बढ्न सक्ने चिन्ता व्यक्त गरिएको छ।
इरानले सोमबार ओमानमा क्षेत्रीय देशहरूसँग समुद्री यातायात व्यवस्थापनबारे छलफल गर्ने तयारी गरेको छ।
