इन्डोनेसियामा २४१ यात्रु बोकेको भिर्गो ट्रान्सपोर्ट ८ नामक जहाज जाभा सागरमा यात्रा गरिरहेका बेला खराब माैसमका सम्पर्कविहीन भएको छ।
यो जहाज पूर्वी जाभाको सुराबाया शहरबाट दक्षिण कालिमान्तानको बान्जारमासिन तर्फ जाँदै थियो। यात्रा क्रममा जहाजसँगको सञ्चार सम्पर्क अचानक टुटेको बताइएको छ।
अधिकारीहरूका अनुसार जहाजको अन्तिम स्थान बान्जारमासिन बन्दरगाहबाट करिब १४८ किलोमिटर टाढा जाभा सागरमा रहेको थियो। खराब मौसमका कारण समस्या भएको हुन सक्ने अनुमान गरिएको छ।
घटनापछि उद्धार टोली तत्काल परिचालन गरिएको छ र जहाजको खोजी कार्य जारी छ। हालसम्म कुनै मानवीय क्षति भएको जानकारी प्राप्त भएको छैन।
उद्धार अधिकारीहरूले यात्रु र जहाजको अवस्थाबारे थप जानकारी संकलन गरिरहेका छन्।
