कुवेतका प्रथम उपप्रधानमन्त्री तथा गृहमन्त्री शेख फहद युसुफ साउद अल–सबाहले देशको इतिहासमै सबैभन्दा ठूलो लागुऔषध बरामद गरिएको घोषणा गरेका छन्।
मंगलबार गरिएको कारबाहीका क्रममा प्रहरीले करिब ५ टन कच्चा लिरिका पाउडर र बिक्रीका लागि तयार पारिएका झण्डै ४० लाख क्याप्सुल बरामद गरेको हो। बरामद लागुऔषधको अनुमानित बजार मूल्य १५ करोड कुवेती दिनार (करिब ४८ करोड ६० लाख अमेरिकी डलर) रहेको बताइएको छ।
कारबाहीका क्रममा लिरिका उत्पादन गर्ने पूर्ण रूपमा सुसज्जित कारखाना समेत फेला परेको थियो। त्यहाँ क्याप्सुल भर्ने र प्याकेजिङ गर्ने मेसिनहरू पनि भेटिएका थिए।
गृहमन्त्रीले यो कारबाहीले कुवेतमा लागुऔषध तस्करीको ठूलो जोखिमलाई उजागर गरेको भन्दै लागुऔषध नियन्त्रणमा खटिएका सुरक्षा अधिकारीहरूको प्रशंसा गरे।
उनले लागुऔषधविरुद्धको अभियान सरकारको प्रमुख प्राथमिकतामध्ये एक रहेको बताउँदै तस्कर तथा कारोबारीमाथि निगरानी र कारबाही अझ कडा बनाइने बताए।
साथै, उनले लागुऔषध नियन्त्रण भनेको पक्राउ र बरामदमा मात्र सीमित नरहेको उल्लेख गर्दै उपचार, पुनर्स्थापना र परिवारमा पुनः फर्काउने प्रयास पनि उत्तिकै महत्वपूर्ण रहेको बताए।
