कुवेतको फौजदारी अदालतले लागुऔषध कारोबार तथा प्रयोगसम्बन्धी विभिन्न मुद्दामा कडा सजाय सुनाएको छ। अदालतले एक बंगलादेशी नागरिकलाई लागुऔषध तथा मनोप्रभावी पदार्थको कारोबार र प्रयोगको अभियोगमा जन्मकैद तथा ५० हजार कुवेती दिनार जरिवाना तोकेको छ।
त्यस्तै, अर्को अभियुक्तलाई लागुऔषध कारोबार तथा प्रयोगको अभियोगमा १५ वर्ष जेल र ५० हजार दिनार जरिवाना सुनाइएको छ। अर्को मुद्दामा लागुऔषध कारोबार, प्रयोग, बिना लाइसेन्स पेस्तोल तथा दुई गोली राखेको र पक्राउका क्रममा सुरक्षाकर्मीलाई प्रतिरोध गरेको अभियोगमा पनि १५ वर्ष जेल सजाय सुनाइएको छ।
अदालतले एक कुवेती नागरिकलाई ह्यासिस र मनोप्रभावी पदार्थको कारोबार गरेको अभियोगमा १० वर्ष जेल तथा ५० हजार कुवेती दिनार जरिवाना सुनाएको छ। यी सबै मुद्दामा लागुऔषध नियन्त्रण विभागको अनुसन्धानपछि अभियुक्तहरू पक्राउ परेका थिए।
कुवेतमा लागुऔषध कारोबार र प्रयोग नियन्त्रण गर्न पछिल्लो कानुनी संशोधनअनुसार कडा सजाय कार्यान्वयन भइरहेको छ। अधिकारीहरूले लागुऔषधको कारोबार, वितरण, कब्जा तथा प्रयोगविरुद्ध कारबाहीलाई थप तीव्र बनाउने बताएका छन्।
