इजरायली रक्षा बल (IDF) का प्रमुख लेफ्टिनेन्ट जनरल एयाल जामिरले दक्षिणी सिरियाको भ्रमण गर्दै इजरायलको सीमासँगै कुनै पनि शत्रुतापूर्ण शक्तिले आफ्नो सैन्य उपस्थिति स्थापित गर्न नदिने चेतावनी दिएका छन्।
जामिरले भने, “हामी सिरियाली मोर्चामा भइरहेको परिवर्तनलाई नजिकबाट निगरानी गरिरहेका छौँ। हामी अझै बहु–मोर्चीय युद्धमा छौँ, सबै क्षेत्रमा सतर्क रहँदै सक्रिय रूपमा काम गरिरहेका छौँ।” 
उनले आवश्यक परेको अवस्थामा इजरायली सेनाले आफ्नो सैन्य क्षमताको प्रयोग जहाँ र जुन समयमा आवश्यक हुन्छ, त्यहीँ गर्ने बताएका छन्। साथै, लामो समयदेखि सेवामा रहेका रिजर्भ सैनिकहरूले गरेको सेवा, त्याग र बलिदानको पनि उनले प्रशंसा गरे।
यो चेतावनी सिरियामा इजरायलले गरेको पछिल्लो हवाई हमलापछि आएको हो, जसले इजरायल र टर्कीबीच सिरियालाई लिएर तनाव थप बढाएको छ। इजरायलले सिरियाको अबु अल-दुहुर एयरबेसमा टर्कीको सैन्य उपस्थिति हुन लागेको दाबी गर्दै हमला गरेको थियो, जबकि टर्की र सिरियाले इजरायलको दाबीलाई अस्वीकार गरेका छन्।
