चीनमा निर्मित COMAC C919 यात्रुवाहक विमानले पहिलो पटक नियमित अन्तर्राष्ट्रिय व्यावसायिक उडान पूरा गरेको छ। अगस्ट १२, २०२६ मा Air China को CA723 उडानका रूपमा C919 बेइजिङबाट उडेर मंगोलियाको राजधानी उलानबातरस्थित चिङ्गिस खान अन्तर्राष्ट्रिय विमानस्थलमा सुरक्षित अवतरण गरेको हो।
विमानले करिब १ घण्टा ४१ मिनेटको यात्रा पूरा गर्दै स्थानीय समयअनुसार साँझ ४:५८ बजे उलानबातरमा अवतरण गरेको थियो। विमानलाई त्यहाँ पानीको फोहोरा बनाएर ‘वाटर सलुट’ दिँदै स्वागत गरिएको थियो।
यो उडान चीनको नागरिक उड्डयन उद्योगका लागि महत्वपूर्ण उपलब्धि मानिएको छ। C919 ले सन् २०२३ देखि चीनभित्र व्यावसायिक सेवा दिँदै आएको थियो, तर उलानबातर उडानसँगै पहिलो पटक नियमित अन्तर्राष्ट्रिय यात्रु सेवामा प्रवेश गरेको हो।
बेइजिङ–उलानबातर रुटमा C919 दैनिक एक राउन्ड ट्रिप सञ्चालन गर्ने योजना रहेको छ। यसले चीनको आफ्नै ठूलो यात्रुवाहक विमानलाई अन्तर्राष्ट्रिय बजारतर्फ विस्तार गर्ने प्रयासलाई नयाँ चरणमा पुर्याएको छ।
यो विमान मुख्यतः Boeing 737 र Airbus A320 परिवारसँग प्रतिस्पर्धा गर्ने चीनको प्रयासका रूपमा हेरिन्छ। यद्यपि अन्तर्राष्ट्रिय बजारमा विस्तारका लागि विभिन्न देशका हवाई सुरक्षा प्रमाणपत्र, मर्मतसम्भार सञ्जाल र स्पेयर पार्ट्स आपूर्ति जस्ता चुनौती अझै बाँकी छन्।
