पुष्कर अथक रेग्मी – साहित्यकार वनमाली निराकारद्वारा लिखित एवं अर्चना शर्मा बिष्ट र आरति शर्मा आचार्यद्वारा प्रकाशित कविता संग्रह ‘मान्छेका रङहरू’ भित्र मूल्य रू.१५०/- रहेको साना ठूला गरी १०६ वटा कविताहरू संगृहित रहेका छन् । कविताहरूलाई मुख्यतः पाँच खण्डमा वर्गीकरण गरिएको छ । पहिलो खण्डमा २४ वटा मसिना कविताहरू रहेका छन्। यी कविताहरू त्रिपदीयदेखि अष्टपदीय स्वरूपसम्मका छन् । दोस्रो खण्डमा गध शैलीका १६ वटा कविताहरू रहेका छन् ।तेस्रो खण्डमा ५+७+५=१७ अक्षरको संरचनामा लेखिएका १८ वटा हाइकु कविताहरू रहेका छन् । चौथो खण्डमा रूवाइ शैलीमा लेखिएका ३५ वटा मुक्तकहरू रहेका छन् भने अन्तिम पाँचौं खण्डमा १३ वटा लामा कविताहरू संगृहित रहेका छन् ।
साहित्यकारद्वय प्राज्ञ बुँद राना र विजय सागरको महनीय अभिव्यक्ति संगै कवि निराकार स्वयंको मेरो भनाइ शीर्षकमा लेखकीय रहेको कृति प्रिय पाठकहरूलाई समर्पण गरिएको छ । विशेषत : यो कृति लेखक ७५ वर्ष प्रवेशको उपहारको रूपमा आएको छ । कृति पठनीय , उदाहरणीय र संग्रहणीय रहेको छ ।
‘मन’ तीन तिर
डुलाउने व्यक्ति
नेपालका ‘मन्त्री’ हुन्छन्
‘मन्त्री’ शीर्षकको त्रिपदीय कविताबाट शुभारम्भ भएको कविता संग्रह ‘ सिद्धार्थ अहिले जन्मिए के हुन्थे ‘ शीर्षकमा गएर समापन भएको छ । कथा संग्रह समयको पर्खाल ( २०४६),कविता संग्रह लोकतन्त्रको शंखनाद (२०६२), पत्र सञ्चयन ( २०६३),संयुक्त कथा संग्रह विवरूका कथाहरू (२०६५),कथा संग्रह एउटा वस्तिको कथा ( २०७१), खनाल वंशावली (२०७४) र लघुकथा संग्रह नयाँ शालिकको जन्म ( २०८०) साहित्यकार वनमाली निराकारका अन्य प्रकाशित कृतिहरू हुन् ।
वि.सं. २००६ साल चैत ७ गते जन्मनु भएका साहित्यकार निराकारको ओैपचारिक नाम वनमाली राज शर्मा खनाल हो । पाल्पा तानसेन धुब्रघाट निवासी माता नेत्र कुमारी शर्मा र पिता शोभाकर शर्माको सुपुत्र वनमाली निरकार नेपाली साहित्यमा विशेषत कवि र कथाकारको रूपमा प्रतिष्ठापित नाम हो । साहित्यकार निराकारको बाँकी जीवन कविता र कथामय बनिरहोस् । सुदीर्घजीवनको प्रार्थना !
