तीतोपाटी – जन-जागृति युवा समाज कुवेतले नेपाली नयाँ वर्ष २०८१ को भित्तेपात्रो सार्वजनिक गरेको छ । विगत १४ वर्षदेखि हरेक वर्ष नेपाली तीथि मिति र चाडपर्व अंकित गरी भित्तेपात्रो प्रकाशन गरि निःशुल्क वितरण गर्दै आएको जन-जागृतिको वार्षिक कार्यविधि अनुसारको नेपाली भित्तेपात्रो २०८१ आज ५ अप्रिल २०२४ शुक्रबारको दिन कुवेतको फरवानिया पार्कमा विभिन्न संघ संस्थाका पदाधिकारी तथा प्रतिनीधिहरू, पत्रकारहरूको विशेष उपस्थिति तथा जन-जागृतिका संरक्षक एवं सल्लाहकारहरू, कार्यकारीहरू तथा अधिकांश सदस्यहरूको समुपस्थिति सहित सार्वजनिक गरिएको हो ।
इस्लाम धर्मको पवित्र महिना रमदानको समय भएकोले अन्य तडक भडक कार्यक्रम नगरिकन नव वर्ष भित्रनु भन्दा केहि दिन अगावै सार्वजनिक गरिएको जन-जागृतिको भित्तेपात्रोमा नेपाली र अंग्रेजी पात्रोको साथमा नेपलाी तीथि, चाड, पर्व, विवाह एवं व्रतवन्ध मुहुर्त लगायत नेपाली दूतावास कुवेतको ठेगाना र जनजागृतिका स्थापनाकालदेखिका संरक्षक, सल्लाहकार तथा सदस्यहरूको नामावली समेत राखिएको छ । उक्त भित्तेपात्रो सार्वजनिक समारोह संस्थाका उपाध्यक्ष जिबन सुनारले संचालन गरेका थिए भने कार्यक्रममा उपस्थित सबैलाइ संस्थाका संरक्षक छत्र बहादुर कार्कीले जन-जागृति युवा समाज कुवेतले सथापनाकालदेखि गर्दै आएका कार्यहरूका बारेमा संक्षिप्त जानकारी गराएका थिए । त्यसै गरि पत्रकार लोमस बास्तोलाले कुवेतको नेपाली समाजमा जन जागृतिले एक छुट्टै पहिचान बनाइ सामाजिक र मानविय सेवाका कार्य गरेकोमा प्रशंसा गर्दै कार्य व्यस्तताले जन-जागृतिमा जोडिन नसकेपनि जन जागृतिका कार्यहरूलाइ नजिकबाट नियालिरहेको जनाउँदै जन-जागृति युवा समाजसँग हातेमालो र सहकार्य गर्ने बताए ।
स्मरण रहोस, कुवेतको नेपाली समाजको पहिलो सामाजिक संस्थाको रूपमा “जागरूक समाजकको खोज, जन-जागृति युवाको सोच” भन्ने मुल नाराको साथ सन २००९ गठन भइ कृयाशिल रहँदै आएको जन-जागृति युवा समाज कुवेतले जन-चेतना, राहत-उद्दार र सामाजिक सेवाका कार्यहरू गर्दै आएको छ । संस्थाले आफ्नो वार्षिक कार्यतालिका अनुसार कुवेतको नेपाली समाजमा भित्तेपात्रो पकाशन गरि निःशुल्क वितरण गर्ने कार्य नियमित रूपमा गर्दै आएको छ भने, हाजिरीजवाफ तथा वक्तृत्वकला जस्ता वौद्दिक कार्यक्रम, गीत, गजल, कवित, मुक्तक जस्ता साहित्यिक कार्यक्रमहरू गरेको समाजले भने स्थापनाकालदेखि नै कुनै जातवर्ग, समुदाय, क्षेत्र वा धर्म संस्कृत तथा राजनैतिक पक्ष नलिइ भाइचारा र भातृत्वको भावनाले अभिप्रेरित भइ पुर्व मेची देखि पश्चिम महाकाली र उत्तर हिमाली क्षेत्र देखि दक्षिण तराइ सम्मका सम्पुणर् नेपालीहरूलाइ लक्षित गरि कर्मभूमि कुवेतमा अप्ठेरामा परेकाहरूलाइ विभिन्न किसिमले सहयोग गर्ने, कुवेतमा कृयाशिल संघ संस्थाहरूसँग हातेमालो र सहकार्य गर्दै नेपाली राजदूतावास संग समन्वय गरि अप्ठेरोमा परेर आर्थिक अभावको कारण नेपाल फर्कन नसकेकाहरूलाइ नेपाल फर्कन लाग्ने टिकटको व्यवस्था देखि मातृभूमि नेपालमा शोषित, पीडित, निर्धन र विपन्न वर्गलाइ लक्षित गरि वर्षेनी लाखौं रूपैयाँ सहयोग गर्दै आएको छ भने नेपालमा सहयोग गर्न आवश्यक भएर सहयोग संचालन गरिएका प्रोजेक्टहरूका लागि सहयोग अभियान संचालन गरेर आर्थिक सहयोग पनि गर्दै आएको छ ।
