तीतोपाटी – करिब २ वर्ष अघि शुरू भइ विश्वभर फैलिएर संसारलाइ चपेटामा पारेको कोरोना महामारीको कारण ज्यान गुमाउनेको संख्या अहिलेसम्म ५० लाख नाघेको छ । कोरोना महामारी सम्बन्धि विभिन्न ताजा तथ्यांक सार्वजनिक गर्दै आएको वर्ल्डमिटर डट इन्फोका अनुसार अहिले सम्म विश्वभर ५० लाख २४ हजार २ सय ५८ जना मानिसहरूको मृत्यु भएको छ । त्यसै गरि कोरोना महामारीबाट संक्रमित हुनेको संख्या २४ करोड ८० लाख भन्दा माथि रहेको छ भने कोरोना संक्रमित भइ निको हुनेको संख्या २२ करोड ६६ लाख भन्दा बढि रहेको वर्ल्ड मिटर डट इन्फोले तथ्यांक सार्वजनिक गरेको छ ।
हाल विश्वभर कोरोना विरूद्धको खोप अभियान संचालन भइरहेको कारण संक्रमण तथा मृत्युदरमा भने कमी आएको छ तर विज्ञहरूले कोरोनाबाट मृत्यु हुनेहरूको संख्या अझ धेरै भएको हुनसक्ने अनुमान गरेका छन् । विश्व स्वास्थ्य संगठन(डब्लूएचओ)ले समेत सार्वजनिक संख्याभन्दा ३ गुणा बढीको मृत्यु भएको हुनसक्ने अनुमान गरेको छ ।
कोरोनाबाट सबैभन्दा बढी अमेरिकामा ७ लाख ६७ हजारभन्दा बढीको मृत्यु भएको छ । दोश्रो धेरै संक्रमित रहेको भारतमा ४ लाख ५८ हजार बढीको मृत्यु भएको छ भने तेश्रो धेरै संक्रमित रहेको ब्राजिलमा ६ लाख ७ हजार भन्दा बढिको मृत्यु भएको छ ।
नेपालमा हालसम्म ९ लाख ८ हजार १ सय ७ जना संक्रमित भएकोमा ११ हजार ४ सय २७ जनाको मृत्यु भएको छ ।
