तितोपाटी – लामो समयदेखि बेरोजगार भइ समयमा स्वदेश फर्कन नपाएपछि साउदीमा अलपत्र नेपाली मदजुरले नेपाल सरकारका बिरूद्ध चर्को नाराबाजी गरेका छन् । साउदी अरबको रियाद स्थित सेमास्को सप्लाई कम्पनीबाट बेरोजगार भएका नेपाली श्रमिकको समुहले आवासगृहमा नै नाराबाजी गरेको हो । उक्त कम्पनीमा कार्यरत एक हजार श्रमिक बेरोजगार भएपछि नेपाल फर्कनको लागि प्रतिक्षारत छन् ।
उनीहरूले पटकपटक स्वदेश फर्कनका लागि निवेदन दिँदा र कम्पनीले पठाउने प्रयत्न गर्दा पनि रियादस्थित दूतावासले बेवास्ता गरेको भन्दै नाराबाजी गरेका हुन् । कम्पनीले दूतावासले असहयोग गरेको भन्ने र दूतावासले कम्पनीले प्रकृया नै अघि नबढाएको भन्दै श्रमिकलाइ पारेपछि उनीहरू अाक्रशित बनेका हुन् ।
साउदी अरबमा यतिखेर हजाराैं नेपाली श्रमिक अलपत्र छन् । कोभिड-19 को कारण लकडाउन भएपछि कतिपय कम्पनीले काम दिन नसक्ने अबस्था भएपछि बस्न र खान दिए पनि पारश्रमिक दिन नसकेपछि बेरोजगार भएको तथा कतिपय श्रमिकको भिसा अवधि पनि सकिएको कारण झण्डै ६ महिनादेखि स्वदेश फर्काइको प्रतिक्षामा बसेका छन् ।
केहि महिना अघि कुवेतको सेल्टरमा रहेका श्रमिकहरूले पनि महिनाैदेखि स्वदेश फर्कन नपाउँदा सरकार बिरूद्ध चर्को नाराबाजी गरेका थिए । यतिखेर खाडीका सबै देशमा अलपत्र रहेका नेपाली श्रमिकहरू स्वदेश फर्काइको प्रतिक्षामा छन् ।
