तितोपाटी – विश्वव्यापी महामारीको रूपमा विश्वलाइ नै हल्लाइरहेको कोभिड-19 को प्रकोपबाट पछिल्लो २४ घण्टामा थप ३२३ जनामा कोरोना संक्रमण पुष्टि भएको छ भने ३२ जनाले कोरोना जितेर घर फर्केका छन् साथै २ जनाको मृत्यु भएको कुरा स्वास्थ्य तथा जनसंख्या मन्त्रालयले पुष्टि गरेको छ। याे सँगे कोरोना संक्रमण हुनेको कुल संख्या ३२३५ पुगेको छ भने अहिलेसम्म ७० जिल्लामा कोरोनाभाइरस फैलिसकेको छ ।
स्वास्थ्य तथा जनसंख्या मन्त्रालयका प्रवक्ता डा. बिकास देवकोटाको अनुसार शनिबार सम्म कुल ३६५ जना कोरोना संक्रमणबाट निको भएर घर फर्किएका छन् । त्यसै डोल्पाका ५८ वर्षीय पुरुष र धनगढीकी ५६ वर्षीया महिलाको मृत्युपछि पिसिआर जाँच गर्दा कोरोना संक्रमण पुष्टि भएको छ । कोरोना संक्रमणबाट हालसम्म सिन्धुपाल्चोकका एक, बाँकेका एक, गुल्मीमा एक, बाराका एक, ललितपुरका एक, अर्घाखाँचीका एक, दैलेखका एक, बाजुराका एक, दोलखाका एक, पाल्पाका एक, सुर्खेतका एक, डोल्पाका एक र धनगढीका एक गरी १३ जनाको मृत्यु भएको छ ।
विश्वव्यापी महामारीको रूपमा संसारभर फैलिरहेको कोरोना भाइरसबाट अहिलेसम्म ६८ लाख ७६ हजार भन्दा बढि संक्रमित भइ ३३ लाख ७० हजार भन्दा बढिले स्वास्थ्यलाभ गरिसकेका छन् भने ३ लाख ९८ हजार भन्दा बढिको ज्यान गइसकेको छ ।
