तोयानाथ उपेक्षित, कुवेतमा डेमेग्राफिक ईम्ब्यालेन्स अर्थात जनसंख्याको सन्तुलन मिलाउन २० लाख विदशीहरुको संख्या घटाउन सांसदहरुले दवाव दिएका छन र त्यसका लागि कानूनको मसौदा शुरु गरिएको छ ।
कुनै पनि देशको जनसँख्या भन्दा विदेशीहरुको संख्या धेरै हुनुलाई राम्रो मानिदैन जसले स्थानिय जनसंख्यासँगको सन्तुलनको अभावमा विभिन्न खालका समस्या निम्त्याउने गर्दछ । यस कुरामा कुवेतका सांसदहरु कोरोनाको कहर पछि जागेको जस्तो देखिन्छ । उनीहरुले कुवेतीहरुको जनसंख्या भन्दा धेरै बाहिरी विश्वका मानिसहरुको संख्या हुन नहुने आवाज बुलन्द गरेका छन ।
कुवेतमा अहिले उनीहरुको जनसंख्या १४ लाख रहेको छ भने बाहिरी विश्वका मानिसहरुको संख्या ३४ लाख रहेको छ । यहाँ विदेशी समेत गरेर २८ लाख भन्दा धेरै हुन नहुने उनीहरुको धारणा छ । यस हिसावले हेर्दा २० लाख मानिस घटाउन पर्ने हुन्छ । सांसदहरुले एक तथ्यांक प्रस्तुत गर्दै सवै भन्दा धेरै जनसंख्या रहेको भारतीयहरुलाई ८ लाख बाट २ लाख १० हजारमा झार्न पर्ने बताएका छन । यसरी नै ५ लाख ५० हजार रहेका ईजिप्सियनहरुको साईज १ लाख ४० हजारमा सिमित गर्न माग गरेका छन ।
कुवेतमा भारतीय नागरिकहरु १५ प्रतिशत, ईजिप्सियनहरु १२ प्रतिशत, फिलिपिनो र श्रीलंकन मिलाउदा १० प्रतिशत रहेका छन । यसरी नै बंगलादेशी, पाकिस्तानी, नेपाली र भियतनामी सरदर ५ प्रतिशतको हाराहारीमा रहेको बताएका छन । उल्लेखित देश बाहेक संसारका अरु सवै देशका संख्या ३ प्रतिशत रहेको छ ।
आजै ६ क्याविनेट मन्त्री र ३२ सांसद सहितको बैठकमा आगामी ३० तारिक पछाडी जनजीवनलाई सामान्य अवस्थामा कसरी फर्काउने भनेर उनीहरु बीच घनिभुत छलफल चलेको थियो । कोरोना नियन्त्रणमा आउन कठिन हुनको मुख्य कारण अधिक आवादी भएको उनीहरुले निश्कर्ष निकालेका थिए । एउटा कोठामा १५ देखि २० जना सम्म मानिसहरु कोचिएर बसेको पाईएको कुरा त्यहाँ उठेको थियो ।
कुवेतमा कोरोनाको प्रकोप पाँचौ चरणबाट ओरालो झरेर चौथो तथा तेश्रो स्टेजमा आएको पनि उनीहरुको निश्कर्ष थियो । यस अवस्थालाई काबुमा लिन अब को रणनिती के हुने भन्नेमा व्यापक चर्चा भएको स्थानिय मिडियाले उल्लेख गरेका छन । जसअनुसार अफिसहरुमा ५० बर्ष नाघेका कुवेतीहरुलाई काम मा जान रोक लगाईने भएको छ । कार्यलयमा बस्दा टेवलहरु एकबाट अर्काको दुरी कम्तिमा २ स्क्वायर मिटर हुन पर्ने भनिएको छ । मास्कको अनिवार्य प्रयोग र अफिसमा खानपानमा पूर्ण प्रतिबन्ध लगाईनेछ ।
बैठकले कोरोनाको मुख्य सेन्टरको रुपमा महावुल्ला, फरवानिया, जीलिप, खैतान, मुर्गाव र विनायद अलगार लाई विशेष रुपमा निगरानी र सर्तकता अपनाउने क्षेत्रका रुपमा लिएको छ । आंशिक कफर्यु कति बेला देखि कति बेला सम्म लगाउने ? र हट स्पोट भनिएका ति क्षेत्रहरुमा कस्तो निति नियम लागु गरिने भन्ने कुरा भोली सार्वजनिक गरिने भएको छ ।
