तितोपाटी – म्याग्दी जिल्लाको मालिका गाउँपालिका–७ बिममा भएको यात्रुबहाक माईक्रो बस दुर्घटनामा चार जनाले ज्यान गुमाएका छन भने २८ जना घाइते भएका छन । दुर्घटनामा परि ७० बर्षिय सतदेवी भट्टचन, ११ बर्षिया आयुसा जुग्जाली र ९ बर्षिय रवि जुग्जाली सहित गुल्मीको कालिगण्डकी गाउँपालिका–२ निवासी ३० बर्षिय विष्णु पाण्डेले ज्यान गुमाएका छन।
दरबाङबाट बिम गाउँतर्फ जाँदै गरेको ग १ ख ४४७६ नम्बरको बस साँझ साढे ६ बजे गलघन्टी भन्ने ठाउँमा दुर्घटना भएको हो । माईक्रो बस घुम्तीमा मोड नपुगेपछि सडकबाट खसेको हुनसक्ने प्रहरीले जनाएको छ । बस सडकको घुम्तीबाट करिब ५० मिटर तल खसेको छ । दुर्घटनामा परि घाईते भएकाहरुको उद्धारमा दरबाङ स्थित इलाका प्रहरी कार्यालयबाट खटिएको प्रहरी टोली, जनप्रतिनिधि र स्थानीयबासी खटिएका थिए ।
माईक्रो बसमा ३३ जना सवार रहेका थिए । दुर्घटनामा घाईते भएका २८ जनामध्ये केहि दरबाङ स्थित प्राथमिक स्वास्थ्य केन्द्रमा उपचार गरि घर फर्किएका छन् । सामान्य बाहेकका केही घाईतेहरुलाई प्राथमिक उपचार पश्चात प्राथमिक स्वास्थ्य केन्द्रले बेनी अस्पतालमा रेफर गरेको थियो । घाईते भएका मध्ये ५ जनालाई बेनी अस्पतालमा उपचार पश्चात थप उपचारको लागि मणिपाल शिक्षण अस्पताल पोखरा रेफर गरिएको छ । भने ४ जना अस्पतालमै उपचाररत रहेको बेनी अस्पतालका सुचना अधिकारी प्रकाश शर्माले जानकारी दिए ।
