तितोपाटी – ओखलढुंगामा दिनदिनै खानेपानीको हाहाकार चर्किदैछ । खडेरीले पानीको मूल सुकेको छ । धुलो/फोहोर र गर्मीले पानीको खपत बढेको छ । एकातर्फ पानीको परिमाण घट्दो छ भने माग बढ्दो छ । चम्पादेवी गाउँपालिकाका अनुसार वडा नम्बर १ र २ मा अन्य वडा भन्दा धेरै पानीको हाहाकार रहेको छ ।
बैशाख, जेठ महिना लागेसंगै पानीका मुहान सुक्दै गएका छन् । चम्पादेवी गाउँपालिका वडा १ र २ बढी प्रभावित भएका छन् । स्थानीय सरकारसँग अपेक्षा राखेका यहाँका जनता २ वर्षसम्म पनि काम नभएपछि उदास बनेका छन् । यी दुई वडामा ११ सय घर रहेका छन् । चम्पादेवी गाउँपालिका वडा १ र २ मा प्रसस्त खाने पानीका मुहान छैनन् । भएका मुहान पनि गर्मीयामले सुकिसकेका छन् ।
टाढाबाट खानी ल्याउँने बजेट नभएको स्थानीय बताउँछन् । स्थानीय मकुवा खोला, पुनाखोला, गिद्दे मुहान लगायत क्षेत्रबाट एक–एक थोपा संकलन गरी पाइप मार्फत ल्याइएको पानी गाउँमा पर्याप्त नभएको स्थानीयको भनाइ छ ।
गाउँमा रहेको खानेपानी समस्या दिर्घाकालीन रुपमा समाधान गर्न चम्पादेवी गाउँपालिकाले खासै चासो नदेखाएको स्थानीयको आरोप छ । गाउँपालिकाले भने १ हजार ४ सय ५० सय मिटर तल रहेको लिखु खोलाबाट लिफ्टिङ गरेर पानी ल्याउने डीपीआर तयार पारेको बताएको छ ।
खानेपानीको समस्या समाधान गर्न स्थानीयले आग्रह गर्दै आएका छन् । बन विनाशबाट पानीका मुहान सुक्न थालेपछि स्थानीय चिन्तित छन् ।
