तितोपाटी – पूर्व प्रधानमन्त्री एवं मन्त्रिपरिषद् उपाध्यक्ष डा. तुलसी गिरीको अाज मंगलबार बिहान ९३ वर्षको उमेरमा निधन भएको छ। कलेजोको क्यान्सरबाट पीडित गिरीको बुढानीलकण्ठस्थित आफ्नै निवासमा निधन भएको पारिवारिक स्रोतले बताएको छ। कलेजोको क्यान्सरले पीडित उनी केही दिनअघि मात्रै मेडिसिटी अस्पतालबाट घर लगिएको थियो। नेपाली कांग्रेसको महामन्त्री हुँदै पञ्चायतकालमा प्रधानमन्त्रीसम्म भएका राजनीतिज्ञ गिरीका श्रीमती, दुई छोरा र दुई छोरी छन्।
सिराहमा जन्मिएका गिरीले सुरुवाती राजनीति नेपाली कांग्रेसबाट गरेका थिए। उनी नेपाली कांग्रेसको महामन्त्री पनि भएका थिए। २०१७ सालमा राजा महेन्द्रले पञ्चायती व्यवस्था लागु गरेपछि भने पञ्चायती व्यवस्थाका कट्टर सर्मथकका रुपमा अगाडि आए। बीपी कोइरालाका आलोचक रहेकै कारण राजा महेन्द्रको विश्वास जितेर पञ्चायतकालमा उनी प्रधानमन्त्री भएका थिए। नेपालमा राजा विरेन्द्रको पालामा बहुदल आएसँगै उनी देश छाडेर श्रीलंका गएर बसोबास गर्न थालेका थिए।
