जिल्ला प्रशासन कार्यालय जुम्लाले स्वास्थ्य सेवा प्रवाह गर्ने स्थान बन्द-हड्ताल निषेध क्षेत्र भएकाले कर्णाली स्वास्थ्य विज्ञान प्रतिष्ठानको अस्पतालमा अनशनरत डा. गोविन्द केसीलाई स्तानान्तरण गर्न नसकिने स्पष्ट पारेको छ।
प्रतिष्ठानलाई प्रशासनले पठाएको प्रमुख जिल्ला अधिकारीद्धारा हस्ताक्षरित पत्रमा सरकारले गत वैशाख १८ गते राजपत्रमा सूचना प्रकाशित गरी स्वास्थ्य सेवालाई बन्द—हड्ताल निषेधित क्षेत्र घोषणा गरेकाले त्यसको पालना गर्न अनुरोध गरिएको छ।
साथै प्रशासनले उक्त सूचनालाई मध्यनजर गर्दै प्रतिष्ठानका कुनै पनि सेवा कुनै पनि बहानामा बन्द नर्गन डा. केसीका समर्थक चिकित्सक तथा नर्सलाई आग्रह समेत गरेको छ।
डा.केसीको समर्थनमा मंगबारदेखि प्रतिष्ठानका चिकित्सक, नर्स र विद्यार्थी त्यहाँको आकस्मिक बाहेकका सबै सेवा ठप्प पारेर सडकमा उत्रिएका छन्।
जिल्ला खेलकुद विकास समिति जुम्लाको कवर्ड हलमा चार दिनदेखि अनशनरत डा. केसीको स्वास्थ्य अवस्था बिग्रिएको भन्दै उनको जीवन रक्षाका लागि प्रतिष्ठानको अस्पतालमा सार्न उनका समर्थक चिकित्सकले प्रशासनलाई आग्रह गर्दै आएका छन्।
डा. केसीमा छाती दुख्ने समस्या बढेको छ भने रक्तचाप पनि तलमाथि भइरहेको उनका समर्थक किशोर केसीले जानकारी दिए।
