फ्रान्सभर शनिबार लाखौं नागरिक प्रदर्शनमा सहभागी भए । फ्रान्सको गृह मन्त्रालयका अनुसार देशभर ४ लाखभन्दा बढी मानिस सडकमा उत्रिएका थिए, जसमा करिब १ लाख १० हजार प्रदर्शनकारी पेरिसमा मात्रै सहभागी थिए।
प्रदर्शनकारीहरूले शिक्षा क्षेत्रमा थप लगानी, युवाका लागि रोजगारीका अवसर वृद्धि तथा बढ्दो महँगी नियन्त्रणको माग गरेका छन्। अधिकांश प्रदर्शन शान्तिपूर्ण भए पनि केही स्थानमा झडप, तोडफोड र लुटपाटका घटना भएका छन्।
फ्रान्सका गृहमन्त्री Laurent Nuñez का अनुसार प्रदर्शनका क्रममा देशभर झण्डै १,००० जनालाई नियन्त्रणमा लिइएको छ। गत साता भएको प्रदर्शनमा ३८५ जना मात्रै पक्राउ परेका थिए। उनका अनुसार अधिकांश प्रदर्शन शान्तिपूर्ण भए पनि केही समूहले प्रहरीमाथि ढुंगा, वस्तु र पटाका प्रहार गरेका थिए।
सुरक्षा व्यवस्था कडा बनाउन फ्रान्स सरकारले देशभर करिब ७०,००० प्रहरी परिचालन गरेको थियो। विशेष सुरक्षा टोली, हेलिकोप्टर, बख्तरबन्द सवारी, प्रहरी कुकुर तथा वाटर क्यानन पनि तयारी अवस्थामा राखिएका थिए।
पेरिसमा प्रदर्शन शान्तिपूर्ण रूपमा अघि बढे पनि अन्त्यतिर केही प्रदर्शनकारी र प्रहरीबीच तनाव सिर्जना भएको थियो। प्रहरीले भीड नियन्त्रण गर्न अश्रुग्यास र वाटर क्यानन प्रयोग गरेको बताइएको छ।
दोस्रो ठूलो सहर मार्सेईमा केही प्रदर्शनकारीहरूले प्रहरीतर्फ पटाका प्रहार गरेका थिए भने केही पसलमा तोडफोड र लुटपाटका घटना भएको स्थानीय सञ्चारमाध्यमहरूले जनाएका छन्। बोर्डोमा पनि प्रहरीले प्रदर्शनकारीमाथि अश्रुग्यास प्रयोग गरेको देखिएको थियो।
यसैबीच, वामपन्थी दलका नेता Jean-Luc Mélenchon ले राष्ट्रपति Emmanuel Macron ले प्रदर्शनकारीका माग सम्बोधन नगरे नोभेम्बर ५ मा राष्ट्रव्यापी आम हड्ताल हुन सक्ने चेतावनी दिएका छन्।
फ्रान्समा मात्रै होइन, इटाली, बेल्जियम र अल्बानियालगायत केही युरोपेली देशहरूमा पनि सरकारविरोधी प्रदर्शन भएका छन्। केही स्थानमा झडप र सुरक्षा चुनौती देखिए पनि अधिकांश प्रदर्शन शान्तिपूर्ण रूपमा सम्पन्न भएका छन्।
