तितोपाटी- प्रमुख विपक्षी दल नेपाली कांग्रेसले दुई नेतालाई कञ्चनपुर पठाउने भएको छ । कञ्चनपुर घटनाबारे अध्ययन गर्न आइतबार दुई नेतालाई पठाउने निर्णय कांग्रेसले गरेको छ ।
शनिबार बसेको कांग्रेस केन्द्रीय कार्यसमितिको बैठकले सरकार शान्ति सुरक्षा कायम गर्न असफल भएको समेत निष्कर्ष निकालेको छ । सत्तारुढ दलकै नेताको गैरजिम्मेवार अभिव्यक्तिका कारण शुक्रबार तनाव उत्पन्न भएको कांग्रेसको ठहर छ ।
कांग्रसका दुई नेता दिलेन्द्रप्रसाद बडू र बीरबहादुर बलायरलाई आइतबार कञ्चनपुर पठाउने कांग्रेसले जनाएको हो ।
कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको घटनाका दोषीलाई छानविन नभएसम्म नागरिक आक्रोशित हुनु स्वभाविक भएको कांग्रसले जनाएको छ । कांग्रेसले कञ्चनपुर घटनाको गहन छानविन गरी अपराधीमाथि कारबाही गर्न र पीडित परिवारलाई राहत दिन माग गरेको छ ।
