तितोपाटी – प्रधानमन्त्री केपी ओलीेले डा. गोविन्द केसीको अनशनको नाममा कांग्रेसले राजनीति गरिरहेको आरोप लगाएका छन् । पार्टी कार्यालय धुम्बाराहीमा मंगलबार आयोजित कार्यक्रममा उनले केसीको अनशनमा कांग्रेस मिसिएको जिकिर गरे ।
‘सरकारले केसीको उपचार गर्न नपाउने ? उनको नाममा अरूको राजनीतिको रोटी सेक्ने, बाटो छेक्ने ? यो हुन सक्दैन,’ उनले भने ।
उनले सबैको नि:शुल्क स्वास्थ्योपचार र गुणस्तरीय शिक्षाका लागि नेकपाले पहल गरिरहेको उल्लेख गर्दै सबै समस्या संवाद र संसद्बाट समाधान हुने बताए । प्रधानमन्त्री ओलीले स्वास्थ्य सेवाजस्तो अत्यावश्यक क्षेत्रमा कर्मचारीले हडताल गर्नु उचित नभएकाले आगामी दिनमा यस्ता रबैया नियन्त्रण गर्ने प्रतिबद्धता जनाए ।
अध्यक्ष पुष्पकमल दाहालले कम्युनिस्टको एकता र निर्वाचनबाट बनेको दुई तिहाइ सरकारविरुद्ध नियोजित प्रचार गरिएको बताए । ‘हामीले चुनाव जिते पनि क्रान्ति जितेका छैनौं, प्रतिक्रान्ति र क्रान्तिकारीबीच लडाइँ जारी छ,’ उनले भने, ‘प्रतिक्रियावादीलाई कम्युनिस्ट एकता र सरकार मन परेको छैन तर हामी त्यस्ता षड्यन्त्र सफल हुन दिन्नौं,’ उनले भने ।
