धादिङकाे सल्यानटारमा डोजरकाे ठक्करबाट घाइते भएकी महिलालाई जिउँदै खाल्डोमा पुर्ने चालकलाई प्रहरीले पक्राउ गरेको छ। कञ्चनपुर बोर्डरबाट सिआइबीले चालक भीमबहादुर बुढाथोकीलाई पक्राउ गरेको डिआइजी सहकुल थापाले बताए।
सिआइबीले आज पत्रकार सम्मेलन आयोजना गर्दै उनलाई भाग्न लागेको अवस्थामा प्रहरीले पक्राउ गरेको डिआइजी थापाले जानकारी दिए।डिआइजी थापाका अनुसार महिलालाई डोजरले ठक्कर दिएर पछि उनी घाइते भइन्। बुढाथोकीले थाहा पाएर पनि जानीजानी पुरेछन्।त्यसपछि उनी फरार थिए। उनी भागेर हरिद्वार गएका थिए। जहाँ उनको दाइ बस्छन्।
उनी चैत ३ गते नेपालगन्ज आएका थिए। विशेष सूचनाको आधारमा उनलाई पक्रन सफल भएको प्रहरीले जनाएको छ।प्रहरीका अनुसार बिना लाइसेन्स उनले डोजर चलाएका थिए।गत फागुन १७ गते घाँस बोकेर घरतर्फ गइरहेकी धादिङकी एक महिलालाई डोजरले ठक्कर दिएपछि जिउँदै पुरेको थियो।सडक खन्न गाउँपालिकाले ठेक्का लगाएको सडक ठेकेदार कम्पनीको डोजरले सोही वडाकी ४५ वर्षीया सरस्वती कुमाललाई सुरूमा ठक्कर दिएको थियो। ठक्करबाट कुमाल घाइते भएपछि बुढाथोकीले उनलाई उद्धार गर्न छोडेर खाल्डोमा पुरेका थिए।
-सेतोपाटीबाट
