कुराले हँसायो कुराले रुवायो
कुराले डुलायो कुराले भुलायो
कुराले जितायो कुराले हरायो
कुराले बिगार्यो कुराले सपार्यो ।१।🌷🙏🌺
कुराको खुराकी कुराको सुराकी
कुरा नै विनोदी कुरा हो बियोगी
कुरा नै बिगारी कुरा नै विचारी
कुराले पियारो बनेमा बिवेकी ।२।🌷🙏🌺
कुराको पिरालो कुराको झमेला
कुराले भुलायो गरायो अबेला
कुरा हुन् विधाता कुरा हुन् पिराहा
कुराको सुराले बनायो सुताहा ।३।🌷🙏🌺
कुराले उज्यालो कुराले अँध्यारो
कुराको झटारो कुराकै पसारो
कुनामा पुर्यायो कुराले घिसार्यो
कुराले उचाल्यो कुराले पछार्यो ।४।🌷🙏🌺
कुराको करौँती कुराको सरौंतो
कुराले प्रशंसा कुराले उभिन्डो
कुराले फतौरो कुराले कुरौटे
कुराले भरौटे कुराले अरौटे ।५।🌷🙏🌺
कुराको कुटानी कुराको पिसानी
कुराले पियारो कुराले रिसानी
कुराले उजेली कुराले बिहानी
कुराले बनायो पियारो निसानी ।६।🌷🙏🌺
प्रशंसा कलाको त्यसैमा गलाको
सबैले गरौँ है यही नै भलो हो
अचाक्ली नहोस् है फतौरा कुराको
बिगारी कुरा नै कुराले सतायो ।७।🌷🙏🌺
हरि शर्मा(गलकोटे कवि)
मिशिगन, अमेरिका । 🌷🙏🌺
