तितोपाटी – विश्वव्यापी महामारीको रूपमा फैलिरहेको कोरोना संक्रमणबाट नेपालमा पछिल्लो २४ घण्टामा थप १५ को मृत्यु भएको छ । यो संख्या दैनिक मृत्यु हुनेहरूको संख्या अहिले सम्मकै अत्याधिक हो । यो सँगै नेपालमा कोरोना संक्रमणबाट मृत्यु हुनेको हालसम्म ३६० पुगेको छ ।
स्वास्थ्य तथा जनसंख्या मन्त्रालयले आयोजना गरेको नियमित कोरोना मिडिया ब्रिफिङमा प्रवक्ता डा जागेश्वर गौतमले मृतकमा ५ जना महिला र १० जना पुरुष रहेको बताए । मर्नेहरू विभिन्न ९ जिल्लाका छन् भने काठमाडाैँका मात्रै ६ जनाको मृत्यु भएको छ ।
मृतक महिलामा काठमाडौँकी ६१ वर्षीया, गोरखाकी ६३ वर्षीया, नवलपरासीका ६२ वर्षीया, पर्साकी ५५ वर्षीया, कपिलवस्तुकी ४७ वर्षीया रहेका छन् ।
त्यसै गरि मृतक पुरुषहरूमा मोरङका २ जना ४० वर्षीय र ७० वर्षीय पुरुष,काठमाडौँका ५ पुरुष ७७ वर्षीय, ६२ वर्षीय, ७३ वर्षीय, ८५ वर्षीय, ७० वर्षीय पुरूष, ललितपुरका ५५ वर्षीय पुरूष, भक्तपुरका ७३ वर्षीय पुरूष र रामेछापका २३ वर्षीय पुरुषको कोरोना संक्रमणले मृत्यु भएको हो ।
