तीतोपाटी- डा. बाबुराम भट्टराई नेतृत्वको नयाँ शक्ति नेपाल र उपेन्द्र यादव नेतृत्वको संघीय समाजवादी फोरम नेपालबीच एकताको प्रयत्न घनीभूत भएको छ ।
फोरम नेपालले राजपा नेपालसँग एकता गर्ने प्रकृया शुरु गरेपनि एकपटक पनि औपचारिक वार्ता भएको छैन । तर नयाँ शक्तिसँग भने औपचारिक वार्ता शुरु भइसकेको छ । एकताकै विषयमा नयाँ शक्ति नेपाल र फोरम नेपालबीच दुई पटक औपचारिक वार्ता भइसकेको छ ।
फोरम नेपालले पार्टीका सहअध्यक्ष राजेन्द्र श्रेष्ठको संयोजकत्वमा गठन गरेको वार्ता समिति र नयाँ शक्तिले नवराज सुवेदीको संयोजकत्वमा गरेको राजनीतिक संवाद समितिबीच छलफल भएको नयाँ शक्ति नेपालका कार्यकारिणी सदस्य गंगा श्रेष्ठले बताए ।
यी दुई दलबीच पहिला पनि पटक पटक वार्ता भएको थियो तर नेतृत्वका लागि कुरा नमिलेपछि तत्कालका लागि वार्ता स्थगित गरिएको थियो । एकीकरण अन्तिम चरणमा पुगिसकेको अवस्थामा नेतृत्वमा कुरा नमिल्दा चुनावपछि पुनः छलफल गर्ने गरी वार्ता स्थगित भएको थियो । त्यही वार्ता पुनः शुरु भएको छ ।
तर कार्यकारणी सदस्य श्रेष्ठ भन्छन्, ‘अब नयाँ ढंगबाट छलफल अगाडि बढेको छ । यसअघि भएका वार्ता छलफल भरपर्दो भएको थिएन । पार्टीको तर्फबाट जसरी जबर्जस्त रुपमा कुराहरु राख्नुपर्ने थियो, त्यतिबेला त्यसरी राख्न सकेको थिएन ।’
त्यतिबेला नयाँ शक्तिको तर्फबाट देवेन्द्र पौडेल, खेमलाल देवकोटा, परशुराम खापुङ्गलगायतले वार्ता गरेका थिए । वैचारिक र पार्टीको सांगठनिक संरचनाको बारेमा त्यति खुलस्त रुपमा कुराकानी नभएको नेता श्रेष्ठको दावी छ । देवेन्द्र पौडेल, खेमलाल देवकोटा पार्टी छाडेर नेकपामा गइसकेका छन् ।
स्रोतका अनुसार नेकपाको मोडल जस्तै बाबुराम भट्टराई र उपेन्द्र यादव दुईजना अध्यक्ष रहने विषयमा छलफल भइरहेको छ । यसअघि फोरम नेपालका अध्यक्ष उपेन्द्र यादवले नै अध्यक्षको दावी गरेको कारण कुरा मिलेको थिएन तर अहिले महाधिवेशनसम्मका लागि दुवैजना अध्यक्ष रहने विषयमा छलफल भइरहेको बताइएको छ ।
स्रोतका अनुसार नेकपाको मोडल जस्तै बाबुराम भट्टराई र उपेन्द्र यादव दुईजना अध्यक्ष रहने विषयमा छलफल भइरहेको छ । यसअघि फोरम नेपालका अध्यक्ष उपेन्द्र यादवले नै अध्यक्षको दावी गरेको कारण कुरा मिलेको थिएन तर अहिले महाधिवेशनसम्मका लागि दुवैजना अध्यक्ष रहने विषयमा छलफल भइरहेको बताइएको छ ।
राजपा नेपालभन्दा पहिले नयाँ शक्तिसँग एकीकरण हुने सम्भावना बढेको फोरम नेपालका एक नेताले बताए । राजपा नेपालसँग अहिले पत्र मात्र आदानप्रदान भएको छ, अझै औपचारिक वार्ता हुने कुनै सम्भावना देखिएको छैन तर यता नयाँ शक्तिसँग औपचारिक वार्ता अगाडि बढिसकेको छ ।
फोरम नेपालका सहमहामन्त्री एवं वार्ता समितिका सदस्य समेत रहेका प्रकाश अधिकारीले भने, हामीले एकताका लागि विभिन्न दलसँग वार्तालाई अगाडि बढाएसँगै नयाँ नेपालसँग पनि छलफल शुरु भएको छ तर अहिले कुनै उपलब्धि भइहालेको चाहिँ छैन ।’ छलफल थुप्रै पार्टीहरुसँग भइरहेको बताउँदै उनले निष्कर्ष निस्केपछि मात्र केही भन्न सकिने बताए ।
मंसिरमा बसेको फोरम नेपालको केन्द्रीय समितिको बैठकले राजपा नेपाललगायत अन्य दलहरुसँग एकताका लागि वार्ता समिति गठन गरेको थियो । समितिले पुस १९ गते तयार पारेको पत्र राजपा नेपालले फागुन १० गते प्राप्त गरेको थियो ।
राजपा नेपालले सो पत्रको जवाफ फागुन ३० गते पठाएको थियो । सो पत्र फोरम नेपालले प्राप्त गरेपछि त्यसको जवाफ चैत ६ गते पठाएको थियो ।
राजपा नेपालले वार्ताका लागि पहिलो शर्त सरकार छाड्नुपर्ने राखे भने फोरम नेपालले पार्टी एकतापछि मात्र सरकार छाड्ने–नछाड्ने निर्णय हुने जवाफ पठाएको थियो । यद्यपि पत्र हेर्दा दुवै पक्ष वार्ताका लागि तयार रहेको देखिएका छन् । राजपा नेपालका अध्यक्षमण्डलका सदस्य राजकिशोर यादवले भने, ‘पत्र आदान–प्रदान भएको छ, अब छिट्टै नै औपचारिक छलफललाई अगाडि बढाउँछौं ।’ राजपा नेपालले अध्यक्षमण्डलका सदस्य राजेन्द्र महतोको नेतृत्वमा वार्ता समिति गठन गरेको छ ।
यसअघि पनि यस्तै भएको थियो । २०७२ सालमा एकताका लागि फोरम नेपाल, तत्कालीन तमलोपा र सद्भावना पार्टीसँग छलफल गरिरहेको थियो । त्यतिबेला एकता अन्तिम चरणमा पुगेको थियो । तर फोरम नेपालले अशोक राई नेतृत्वको संघीय समाजवादी पार्टी नेपालसँग २०७२ जेठ ३२ गते एकीकरणको घोषणा गर्यो ।
यसपटक पनि त्यही हुने सम्भावना बढेको छ । एकताका लागि राजपा नेपालसँग वार्ताको प्रकृया अगाडि बढाएको छ तर नयाँ शक्तिसँग पहिला एकीकरण हुने सम्भावना बढ्दै गइरहेको देखिएको छ ।
साभार रातोपाटी
