काठमाडौं । पूर्वअर्थमन्त्री तथा नेकपा (एमाले)का उपाध्यक्ष विष्णु पौडेलविरुद्ध सम्पत्ति शुद्धीकरण अनुसन्धान विभागले रु २० करोड ९० लाख बिगो दाबी गर्दै आज विशेष अदालतमा मुद्दा दायर गरेको छ। उनीसहित ६ जना व्यक्ति र १० वटा कम्पनी, गरी १६ जना/संस्थाविरुद्ध अभियोग दर्ता गरिएको हो।
विभागले व्यवसायी दीपक भट्टसँग सम्बन्धित आर्थिक कारोबारमा पौडेलले मतियारको भूमिका खेलेको आरोप लगाएको छ। अभियोगपत्रमा पौडेलमाथि सम्पत्ति शुद्धीकरण कसुरमा कारबाही र उनको बैंक खातामा रहेको ६ लाख ३४ हजार रुपैयाँ जफत गर्न समेत माग गरिएको छ।
पौडेललाई सम्पत्ति शुद्धीकरण अनुसन्धानको क्रममा २१ दिनअघि पक्राउ गरिएको थियो। अनुसन्धानका लागि विशेष अदालतले पटक–पटक म्याद थप गरेपछि अन्ततः अनुसन्धान सम्पन्न गरी अभियोगपत्र दायर गरिएको हो।
यो मुद्दामा अब विशेष अदालतले अभियोगको प्रारम्भिक परीक्षण गर्दै थुनछेक र त्यसपछिको नियमित सुनुवाइ प्रक्रिया अघि बढाउनेछ। आरोप लाग्नु र मुद्दा दायर हुनु दोषी ठहर हुनु होइन; अन्तिम निर्णय अदालतको फैसलाबाट हुनेछ।
