इरानका प्रमुख वार्ताकार गालिबाफ : ‘युद्ध चाहँदैनौँ, तर राष्ट्रिय सुरक्षाका लागि अन्तिमसम्म लड्न तयार छौँ’
तेहरान। इरानका प्रमुख वार्ताकार मोहम्मद बाकर गालिबाफ ले इरानले कहिल्यै युद्ध नचाहेको तर राष्ट्रिय सुरक्षा र हितको रक्षा गर्न सधैं तयार रहनुपर्ने बताएका छन्।
गालिबाफले भने, “हामी युद्ध खोज्दैनौँ, तर आवश्यक परे आफ्नो सुरक्षा र राष्ट्रिय स्वार्थका लागि अन्तिमसम्म उभिन तयार छौँ।” उनले कूटनीति र वार्तालाई पनि इरानको रणनीतिक उपकरणका रूपमा प्रयोग गर्नुपर्ने बताए।
उनका अनुसार राष्ट्रिय हित हासिल गर्न वार्ता र कूटनीतिक माध्यमलाई बेवास्ता गर्न नमिल्ने भए पनि त्यसलाई कमजोरी वा सम्झौताका रूपमा बुझ्न नहुने धारणा राखे।
इरान र अमेरिकाबीच भएको समझदारी ज्ञापन (Memorandum of Understanding – MoU) बारे बोल्दै गालिबाफले भने, “यदि इरानले त्यसबाट लाभ पाउने अवस्था छैन भने त्यसको पालना गर्नुको कुनै कारण रहँदैन।”
उनले वर्तमान परिस्थितिमा वार्ता गर्नु आत्मसमर्पण नभएको दाबी गर्दै भने कि वार्ता र युद्ध दुवै प्रतिरोध तथा राष्ट्रिय हित सुरक्षाको रणनीतिक हिस्सा हुन सक्छन्।
गालिबाफले केवल वार्ता वा केवल युद्धलाई मात्र समाधान ठान्नु रणनीतिक गल्ती हुने बताए। उनका अनुसार देशको हित सुरक्षित गर्न आवश्यकताअनुसार कूटनीतिक र सैन्य दुवै विकल्प खुला राख्नुपर्छ।
इरानी नेताको यो भनाइले तेहरानले एकातर्फ कूटनीतिक ढोका खुला राख्न खोजेको र अर्कोतर्फ सैन्य तयारीलाई दबाबको माध्यमका रूपमा प्रयोग गरिरहेको संकेत गर्छ। इरान–अमेरिका सम्बन्धमा वार्ता र शक्ति प्रदर्शन दुवै समानान्तर रूपमा अघि बढिरहेको देखिन्छ।
