गोरखा समाज कुवेतको प्रथम ऐतिहासिक अधिवेशन नयाँ कार्यसमिति सर्वसम्मत चयन गर्दै सम्पन्न भएको छ। खैतानस्थित राजधानी प्यालेसको सभाहलमा आयोजित अधिवेशनले मदन पनेरूको अध्यक्षतामा नयाँ नेतृत्व चयन गरेको हो।
नवगठित कार्यसमितिको वरिष्ठ उपाध्यक्षमा कृष्ण पोखरेल, उपाध्यक्षमा कृष्ण बानियाँ, महिला उपाध्यक्षमा कुमारी गुरुङ, महासचिवमा बालकृष्ण भट्ट (विराज), सचिवमा अशोक श्रेष्ठ, सहसचिवमा गोमा भट्ट, कोषाध्यक्षमा काजीराम नहर्की र सह–कोषाध्यक्षमा शुशिला तामाङ सर्वसम्मत निर्वाचित भएका छन्। त्यस्तै, युवा संयोजकमा विकास गुरुङ र सह–युवा संयोजकमा हित काजी जिसी चयन भएका छन्।
कार्यक्रम मदन पनेरूको सभापतित्वमा सम्पन्न भएको थियो भने नेपाली दूतावास कुवेतका द्वितीय सचिव तथा सूचना अधिकारी शिव बानियाँ प्रमुख अतिथि रहेका थिए। कार्यक्रममा एनआरएनए कुवेत, नेपाल पत्रकार महासंघ कुवेत, नेपाल आदिवासी जनजाति महासंघ कुवेत, विभिन्न राजनीतिक दलका वैदेशिक भातृ संगठन, नेपाली संघसंस्थाका प्रतिनिधि, समाजसेवी, बुद्धिजीवी, पत्रकार, कलाकार, व्यवसायी तथा खेलाडीहरूको उपस्थिति रहेको थियो।
रोशन राईको सञ्चालन रहेको कार्यक्रममा कृष्ण बानियाँले स्वागत मन्तव्य व्यक्त गरेका थिए। साथै, पन्चेबाजा तथा स्थानीय कलाकारहरूको सांस्कृतिक प्रस्तुतिले कार्यक्रमलाई आकर्षक बनाएको थियो।
कार्यक्रमका वक्ताहरूले शुभकामना मन्तव्य व्यक्त गर्दै कुवेतको स्थानीय कानुन, नियम र परम्पराको पूर्ण सम्मान र पालना गर्नुपर्नेमा जोड दिएका थिए। कुवेतमा ९० भन्दा बढी नेपाली संघसंस्था स्थापना भए पनि सीमित संस्था मात्र सक्रिय रहेको उल्लेख गर्दै नवगठित गोरखा समाज कुवेतलाई निरन्तर सक्रिय रहन आग्रह गरिएको थियो।
नवनिर्वाचित अध्यक्ष मदन पनेरूले रोजगारीका सिलसिलामा कुवेतमा रहेका गोरखालीहरूलाई एकताबद्ध गर्दै अन्य संघसंस्थासँग सहकार्य गर्ने प्रतिबद्धता जनाए। साथै, राष्ट्रिय तथा अन्तर्राष्ट्रिय स्तरमा गोरखाली पहिचान प्रवर्द्धन गर्दै सामाजिक सेवा र मानवीय कार्यमा योगदान पुर्याउने लक्ष्य रहेको उनले बताए।
“गोरखा हाम्रो सान, नेपालीको पहिलो पहिचान” भन्ने मूल नारासहित हालै स्थापना भएको गोरखा समाज कुवेतलाई सामाजिक सेवा तथा मानवीय कार्यमा सक्रिय रहने अपेक्षा गरिएको छ।
