तितोपाटी – पाल्पामा सहकारी संस्थाकाे रकम हिनामिना गरेकाे आराेपमा रम्भा गाँउपालिकामा मुख्य कार्यालय रहेको लालीगुँरास वचत तथा ऋण सहकारी संस्थाका व्यवस्थापक पक्राउ परेका छन् । उक्त सहकारी संस्थाका व्यवस्थापक विष्णुबहादुर बम्रेल पक्राउ परेका हुन। सहकारी संस्थाकाे झण्डै तीन कराेड रकम हिनामिना गरेकाे वम्रेलमाथि आराेप छ ।
बम्रेल सहकारीकाे रकम हिनामिना भएकाे सार्वजनिक भएपछि बाहिरी सम्पर्कमा थिएनन् । प्रहरीले बम्रेललाई पक्राउ गरेकाे पुष्टि गरेकाे छ ।
पाल्पाका प्रहरी प्रमुख पवनकुमार भट्टराइले बम्रेल सहकारी सम्बन्धी मुद्दामा पक्राउ परेकाे र थप अनुसन्धान भइरहेकाे बताउनुभयाे । लालीगुरास सहकारी संस्था रम्भा गाउँपालिका वडा नं. ४ मा मुख्य कार्यालय रहेकाे संस्था हाे ।
सहकारीको धन्नै तीन करोड रकम अपचलन भएपछि वचतकर्ता विचल्लीमा परेका छन् । रम्भा, पूर्वखाेला, माथागढी र बगनासकाली गाँउपालिकाका १ हजार वचतकर्ता विचल्लीमा परेका हुन् । रम्भा गाउँपालिका–४, हुमिनस्थित लालीगुँरास वचत तथा ऋण सहकारी संस्थाका व्यवस्थापक विष्णुबहादुर बम्रेल पक्राउ परेपछि वचतकर्ता दिनहुँ रकम फिर्ताका लागि सहकारीमा धाउने गरेका छन् ।
पक्राउ परेका बम्रेलले संस्थाको दुई करोड ८७ लाख ५७ हजार रकम अपचलन गरेको आरोप लागेको छ । सहकारी संस्थाबाट फर्जी ऋणी तयार गरेर रकम हिनामिना गरेको आरोप बम्रेलमाथि छ । संस्थाको संचालक समितिका अध्यक्ष सुवी विकले दिनुभएको उजुरीका आधारमा बम्रेललाई पक्राउ गरिएको जिल्ला प्रहरी कार्यालय पाल्पाका प्रहरी निरीक्षक कमल प्रधानले जानकारी दिनुभयो ।
बम्रेललाई पाल्पा रम्भा–४, हुमिनस्थित घरबाटै पक्राउ गरिएको उहाँले बताउनुभयो । व्यवस्थापक बम्रेलले रकम हिनामिना गरेको सञ्चालक समितिका अध्यक्ष सुवि विकले बताउनुभयो । २०८१ माघमा आफू अध्यक्षमा निर्वाचित भएपछि रकम हिनामिना गरेको थाहा पाएको विकले बताउनुभयो। सहकारी संस्थाले रम्भा, पूर्वखोला, बगनासकाली र माथागढी गाउँपालिकामा वचत तथा ऋणको कारोबार गर्दै आएको थियो। त्यस क्षेत्रका करिव एक हजार वचतकर्ता अलपत्र परेका छन् । वचतकर्ताका पाँच करोड रकम फिर्ता गर्न बाँकी छ । यस्तै राष्ट्रिय सहकारी बैँकको एक करोड रकम फिर्ता गर्न बाँकी भएको सहकारीले जनाएको छ ।
