एसीसी यू-१६ इस्ट जोन कपको उपाधि नेपालले जितेको छ । शनिबार भएको फाइनलमा सिंगापुरलाई २ विकेटले हराउँदै नेपालले उपाधि जितेको हो । सिंगापुरले दिएको ११४ रनको लक्ष्य नेपालले २९ ओभरमा ८ विकेटको क्षतिमा पूरा गर्यो। नेपालका लागि जोय थापाले अविजित २४ रनको पारी खेले । शिवांश बजगाइले २० रन बनाए ।
४० रनमा १ विकेट गुमाएको नेपालले निरन्तर विकेट गुमाउँदा ५८ रन पुर्याउदा ५ विकेट गुमाएको थियो । त्यसपछि जोय र शुभम खनाल मिलेर साझेदारी बनाएका थिए । नेपालको स्कोर ९१ पुग्दा ६ विकेट गुमाएको थियो जसमा शुभम १६ रनमा आउट भएका थिए नेपाल ९२ रनमा ८ विकेट गुमाएको थियो । जोयले लगातार तीन चौका प्रहार गर्दै अभय यादवसँग मिलेर राम्रो साझेदारी बनाउदै अभयले विजयी छक्का प्रहार गरेका थिए ।
टस जितेर पहिले ब्याटिङको निर्णय गरेको सिंगापुर ४०.५ ओभरमा ११३ रनमा अलआउट भएको थियो । सिंगापुरका लागि रोहन अस्टिनले सर्वाधिक २३ रन बनाए । उनले ९० भन्दा धेरै बल खेलेका थिए । रिहान नाइकले १५ रन बनाए । सिंगापुरका कपिश भेनकटरमनले ४ विकेट, युवान पाण्डेले २ विकेट लिएका थिए भने आकाश तेजा र वेदांश गुप्ताले १-१ विकेट लिएका थिए ।
नेपालका लागि अभय यादवले ३ विकेट, सुशिल बहादुर रावलले ३ विकेट, शुभम खनालले २ र कप्तान बिपिन प्रसाद शर्माले १ विकेट लिएका थिए । नेपाल यस प्रतियोगितामा अपराजित रहेर उपाधि जितेको हो । सिंगापुर समूह चरणमा पनि नेपालसँग पराजित भएको थियो । नेपालले यसअघि सन् २०२३ मा भएको इस्ट जोन कपको पनि उपाधि जितेको थियो । त्यसअघि एसीसीले यू-१६ इस्टर्न रिजनको नाममा प्रतियोगिता आयोजना गर्दै आएको थियो र नेपालले २०१७ र २०१९ मा पनि लगातार उपाधि जितेको थियो ।
