मुक्तक
###
मुटु साट्ने रहर थियो कुरा गर्न आइनौ
खाली नै थ्यो मन पनि प्रेम भर्न आइनौ
मंसिर,बैशाख कति गए आशा डढाएर
जोतीराखें बाँझो मन बीउ छर्न आइनौ ।
आँखा चिम्म नगरी हेर्छु तिमीलाइ
प्रेमको डोरीले कम्मरमा बेर्छु तिमीलाइ
कसैले अपहरण गर्छ की भन्ने डर सँधै भो
चारैतिर अग्लो पर्खाल लगाइ घेर्छु तिमीलाइ ।
कति पर्खे तिम्रो बाटो,कति तड्पे तिमी भन्दै
कति बसे दिन रात क्यालेण्डरमा हेरी गन्दै
तिमी भनी भाका सार्दै कुराले नै ठिक्क छ
कति खसें आँखाबाट सम्झनाले बारी खन्दै ।
देखाएर देखिन्न माया सिकाएर लाइन्न
धड्कन जस्तो जति खोज माया गर्ने पाइन्न
रहरले नदी खोज्दै सँधै सागर पछ्याउँछ
विश्वासमा शंकाको छाना छाएर छाइन्न ।
पैसा टिप्न बिदेश आएँ बालवच्चा छोडी
माया गर्ने प्रेमीकाको बाचा बन्धन तोडी
थाहा पाएँ आफ्नै देशमा पैसा फल्ने रहेछ
कसो गरी फर्कुँ अब जेलको भित्तो फोडी ।
-जनार्दन अधिकारी ‘धड्कन’
पाल्पा, रामपुर
