“पाँच तत्व पाँचै विकार, पञ्चाङ्ग नै ठिक आधार“
पञ्चाङ्ग ३ (तीन)
१
झम् झम् वर्षे झरी पातमा गाइरहे गानाहरू
खरको छानो तप्प तप्प चुहिरहे छानाहरू
तारामण्डल छानो हजुर गरिबीको जीवन
छैन घुम्, भिज्यो शरीर लाउने आफ्ना नानाहरू
जति पल्टाउँ उस्तै लाग्छन् जिन्दगीका पानाहरू ।
२
चौबिसै घण्टा बादल पानी बनी झरेर आयो
पल्लो किनारबाट ओल्लो किनार सरेर आयो
यस्तै रहेछ प्राकृतिक प्रकोपभन्ने कुरा पनि
समस्या नै त हो एकपछि अर्को परेर आयो
पारि गाउँदेखि वारि गाउँसम्म सरेर आयो ।
३
सबैदेखि अघाएर तिमीलाई चुनेर ल्याइयो
साथ, सहयोग र विश्वासलाई गुनेर ल्याइयो
होला नि त समाज विकासभन्ने आशा छ मनमा
गुण र आत्मसमर्पणका कुरा सुनेर ल्याइयो
तलदेखि माथिसम्म सबै जालो बुनेर ल्याइयो ।
सविता के.सी.
काठमाडौ
