१.
नेपाल देश सुन्दर भेष हेर्दैमा क्या राम्रो,
पहाडी स्वच्छ हावा र पानी फेर्दैमा क्या राम्रो ।
मुनाल डाँफे मयुर अनि गुराँस झुलेका,
मौलिक भाषा पोशाक हाम्रो बेर्दैमा क्या राम्रो ।
२.
दुनियामा समयको खेल भयो,
मान्छे नै कोरोनालाई तेल भयो ।
छैन अछुतो वृद्ध, बाल, बयष्क,
हे प्रभु ! विज्ञान पनि फेल भयो ।
३.
हिड्दाहिड्दै ढल्दैछ जीवन,
बोल्दाबोल्दै गल्दैछ जीवन ।
डढेलोमा जङ्गल जले सरी,
झ्याप्पझुप्प जल्दैछ जीवन ।
४.
विनाकाम लखर–लखर जान्छौ कहाँ तिमी ?
लुकीलकी अनेक खुराक खान्छौ कहाँ तिमी ?
पालना गर्छौ या गर्दैनौ स्वास्थ्य मापदण्डको,
एकबारको जिन्दगी यो लान्छौ कहाँ तिमी ?
५.
कता गए निको हुने ?
कता भए छिटो हुने ?
धौडधुप त चलेकै छ,
कसो गरी हिरो हुने ?
मनबहादुर खत्री ‘मनु’
इस्मा–२, मैनडाँडा, गुल्मी
