तितोपाटी- नेपाल कम्यूनिष्ट पार्टी (नेकपा) की केन्द्रीय सदस्य रामकुमारी झाँक्री पक्राउ विरुद्धमा जनता समाजवादी पार्टीका संघीय परिषद् अध्यक्ष एवं पूर्वप्रधानमन्त्री बाबुराम भट्टराईले विरोध गरेका छन् । उनले झाँक्रीलाई राज्यविरुद्धको कसुर आरोपमा प्रहरीले आज पक्राउ गरेपछि सामाजिक सञ्जाल ट्वीटरमार्फत सरकारप्रति आपत्ति जनाएका हुन् ।
नेपालको संविधानले प्रत्येक नागरिकलाई विचार तथा अभिव्यक्ति स्वतन्त्रता दिएको तर राष्ट्रपतिले त्यसलाई उल्लंघन गरेको भट्टराईले आरोप लगाएका छन् । भट्टराईले लेखेका छन् , ’ओली सरकारले राष्ट्रपतिबारे विचार अभिव्यक्ति दिएकै आधारमा युवा नेतृ रामकुमारी झाँक्रीलाई गिरफ्तार गरेछ ! नेपालको संविधानले प्रत्येक नागरिकलाई “विचार र अभिव्यक्तिको स्वतन्त्रता” नै दिन्छ । “संविधानको पालन र संरक्षण” गर्नु पर्ने राष्ट्रपतिले नै उल्लंघन गरेपछि किन नबोल्ने ? यो सरकारको काल आएकै हो ?’
राष्ट्रपतिविरुद्ध गाली गलौज र मानमर्दन हुने गरि अभिव्यक्ति दिएको भन्दै प्रहरीले बिहीबार नेकपाको दाहाल–नेपाल समूहकी नेतृ झाँक्रीलाई शंखमूलस्थित निवासबाटै पक्राउ गरेको हो । पक्राउपछि झाँक्रीलाई महानगरीय अपराध महाशाखा, मीनभवनमा राखिएको छ ।
