तितोपाटी-बिमा समितिले पुनः श्रम स्विकृति लिने ग्राहकहरुको बिमा शुल्क अनलाइनमार्फत् बुझ्न बिमा कम्पनीहरुलाई निर्देशन दिएको छ ।
वैदेशिक रोजगार बिमा पुलमा काम गरिरहेका चार जीवन बिमा कम्पनीलाई पुनः श्रम स्विकृति लिने ग्राहकहरुलाई अनलाइनमार्फत् शुल्क भुक्तानीको व्यवस्था मिलाउन निर्देशन दिएको हो । वैदेशिक रोजगारी बिमा पुलमार्फत् नेशनल लाइफ इन्स्योरेन्स, सूर्या लाइफ इन्स्योरेन्स, युनियन लाइफ इन्स्योरेन्स र रिलायबल नेपाल लाइफ इन्स्योरेन्सले वैदेशिक रोजगारमा जानेहरुका लागि म्यादी जीवन बिमा गर्दै आएका छन् । ग्राहकहरुले विदेशस्थित नेपाली कुटनीतिक नियोगबाट पुनः श्रम स्वीकृति लिँदा बिमाको प्रिमियम अनलाइनबाटै लिने व्यवस्था गर्न निर्देशन दिएको समितिका प्रमुख कार्यकारी निर्देशक राजुरमण पौडेलले जानकारी दिए ।
सरकारले वैदेशिक रोजगारीमा रहेका श्रमिकले विदेशस्थित नेपाली कुटनीतिक नियोगमार्फत् दुई पटकसम्म श्रम स्वीकृति लिन पाउने व्यवस्था गरेको छ । सरकारले श्रम स्विकृतिलाई सजिलो बनाएसँगै म्यादी बिमाको शुल्क बुझाउने प्रक्रिया सहज गराउन समितिले निर्देशन दिएको हो ।
वैदेशिक रोजगारीमा जाने नेपालीहरु अनिवार्य रुपमा म्यादी जीवन बिमा गर्नुपर्छ । अनलाइनको सुरुवात भएसँगै विदेशमा रहेका नेपाली कामदारले अब भिषाको म्याद थप्न र पुनः श्रम स्वीकृतिका लागि नेपाल आउनुपर्ने बाध्यता हट्नेछ । समितिले यसअघि म्यादी जीवन बिमाको कामलाई व्यवस्थित बनाउन पुल प्रणालीको व्यवस्था गरेको थियो । बिमा कम्पनीहरुबीच अस्वस्थ प्रतिस्पर्धा भएपछि यसलाई हटाउन समितिले पुलको व्यवस्था गरेको हो । उक्त प्रणालीमा चार वटा कम्पनीले काम गर्दै आएका छन् ।
समितिको तथ्यांकअनुसार गत आर्थिक वर्षसम्ममा वैदेशिक रोजगार म्यादी जीवन बिमावापत कम्पनीहरुले साढे २ अर्ब रुपैयाँ बिमा शुल्क आर्जन गरेका छन् ।
साभार कारोबार दैनिक
