काठमाडौं – सफल फिल्म ‘छक्का पन्जा’ टिमसँग निर्माता रोहित अधिकारीको सहकार्यमा निर्माण भएको फिल्म ‘छ माया छपक्कै’ को फस्टलुक सार्वजनिक भएको छ । फिल्मका निर्देशक दीपेन्द्र लामा लगायत फिल्म युनिटले सामाजिक सञ्जालमार्फत फिल्मको फष्टलुकको रुपमा एक पोष्टर सार्वजनिक गरेका हुन् । 
सार्वजनिक फष्टलुकमा फिल्मका प्रमुख कलाकारहरु दीपकराज गिरी, केदार घिमिरे, जीतु नेपाल र केकी अधिकारी देखिएका छन् । आमा सुरस्वती मुभिज, रोहित अधिकारी फिल्मस्को ब्यानरमा बनेको फिल्मको पोष्टरमा भने प्रदर्शन मिति खुलाइएको छैन । ४० वर्ष उमेर अन्तरालको प्रेम कथामा बनेको फिल्मको जीतु र केदार कार्यकारी निर्माता हुन् ।
हरि हुमागाइँको छायाँकन, रोशन श्रेष्ठको द्वन्द्व, दीपक शर्माको संगीत, कविराज गहतराजको कोरियोग्राफी र विपिन मल्लको सम्पादन रहेको फिल्मको कथा निर्देशक लामाको हो । उनको कथालाई कलाकार दीपकराजले पटकथामा ढालेका हुन् ।
संवादमा भने केदार, जीतु र अभिमन्यू निरबीले दीपकलाई सघाएका छन् । एक गीत खिच्न अझै बाँकी फिल्मको सुस्ताएको बजार ‘छ माया छपक्क’ ले ब्यूँत्याउने अपेक्षा गरिएको छ । मुनाफाको ५० प्रतिशत लिने शर्तमा दीपकराज समुहले निर्माता रोहित अधिकारीसँग सहकार्य गरेका हुन् ।
-रातोपाटीबाट
