तितोपाटी – संभ्रान्त परिवारका युवतीहरूलाइ विवाह गर्ने प्रलोभन देखाइ ठगी गर्दै हिंड्ने एक युवा विरूद्धको उजुरी यतिवेला प्रहरीमा परेको छ । हुँदै नभएको पद देखाएर युवतीहरूसँग नजिक हुने र प्रेम सम्बन्ध कायम गरी विवाह गर्ने प्रलोभन देखाइ धन सम्पती ठगी गर्दै हिँड्ने नवलपरासी डन्डाका २८ वर्षीय रोनाल्डराज आचार्यका विरूद्ध जाहेरी परेपछि उनको खोजी प्रहरी लागेको बुझिएको छ । लामो समय देखि फरक फरक ठाउँका फरक फरक युवतीहरूलाइ ठग्दै आएका आचार्यको विरूद्ध पीडित युवती खानदानी घरानाका भएकाले पारिवारिक प्रतिष्ठाको कारण उनीहरू खुलेर बाहिर आउन नसकेको प्रहरीले बताएको छ ।
पछिल्लो पटक ठगिएकी ज्ञानेश्वरकी किरण शाह (नाम परिवर्तन)ले प्रहरीमा उजुरी गरेपछि मात्रै यो विषय बाहिर आएको हो । आचार्यसँग प्रेम सम्बन्धमा रहेकी शाह त्यतिवेला छाँगाबाट खसेझै भइन्, जतिवेला एक अपरिचित युवतीले हुनेवाला दुलाहको असली धन्दा पर्दाफास गरिन् । त्यस वेलासम्म ढिला भइसकेको थियो । नगुम्नुपर्ने गुमिसकेको थियो । महानगरीय प्रहरी परिसर काठमाडौं टेकुस्थित कार्यालयमा आइतबार भेटिएकी उनी प्रहरीसँग भन्दै थिइन्, ‘त्यसले मेरो सबै सक्यो । त्यसविरुद्ध कानुनी कारबाही गरिपाऊँ ।’
केही सातापछि मात्रै दुईबीच इन्गेजमेन्ट हुँदै थियो । यसका लागि राजधानीको पाँचतारे होटेल बुक गरिएको थियो । उपहार दिन डेढ करोड रुपैयाँको ल्यान्डरोभर कारसमेत तयार थियो । तर, जब हुनेवाला दुलाहाको असली धन्दा सतहमा आयो, बल्ल सबै योजना तासको घरझै भताभुंग हुन पुगे । आचार्य अहिले प्रहरी हिरासतमा छन् । शाह न्याय खोजीमा भौँतारिँदै छिन् ।
प्रहरीका अनुसार आचार्यले शाह जस्तै २० भन्दा धेरै युवतीलाई यसैगरी फसाइसकेका छन् । ‘उसको खास धन्दा विभिन्न प्रलोभनमा युवती फसाउने र धनमाल लिने रहेको देखिन्छ । उसले २० भन्दा धेरै युवतीलाई ठगी गरेको पाइएको छ । प्रहरीका अनुसार शाह र आचार्यबीच अस्पतालमा भएको दोस्ती प्रेममा बद्लियो । आचार्यले उनलाई आसध्यै माया गर्थे । ख्याल पनि उत्तिकै गर्थे । परिवारसँग उनी अतिनिकट थिए । इन्जिनियर भनेर परिचित उनीप्रति शाह परिवार उत्तिकै प्रभावित थियो । दुईले विवाह गर्ने मनस्थिति बनाए । शाहले आचार्यसँग विवाहको प्रस्ताव राखिन् । उनले स्विकार गरे । विवाहको प्रसंग परिवारसम्म पुग्यो । परिवार पनि सहमत भएपछि इंगेजमेन्टको मिति तय भयो । इंगेजमेन्टका लागि स्थान तोकियो काठमाडौंको एक पाँचतारे होटेल । गरगहना खरिद भए । ज्वाइँलाई उपहार दिन डेढ करोड मूल्यबराबरको ल्यान्डरोभर कार बुक भयो ।
यही क्रममा शाहलाई एक अपरिचित युवतीले फोन गरिन् । फोनमा आचार्यको बारेमा ‘केही भन्नु छ’ भनिन् । दुईबीच भेट्ने सहमति भयो । शाहले युवतीबीच भएको कुराकानीको प्रसंग आचार्यलाई पनि भनिन् । उनले अपरिचित ती युवतीलाई भेट्ने योजनामा आफू रहेको सुनाइन् । जब युवतीलाई भेट्न दुवैसँगै जाने योजना बन्यो, त्यसपछि आचार्य एकाएक बेपत्ता भए । कतै पत्ता नलागेपछि उनले ती युवतीलाई भेटिन् । त्यसपछि पो थाहा पाइन, आचार्यले यसअघि ती युवतीलाई त्यसैगरी फसाइसकेका रहेछन् ।
-नयाँपत्रिकाबाट
