तितोपाटी – सिन्धुपाल्चोकको सुनकोसी गाउँपालिका–३ पुनःनिर्माण सक्ने पहिलो वडा बनेको छ । एक गैरसरकारी संस्थाको सहयोगमा वडाबासी सबैले भूकम्प प्रतिरोधी घर निर्माण गरेसँगै सो वडा पुनःनिर्माण सक्ने पहिलो बनेको हो । सुनकोसी गाउँपालिका–३ कालिकाका ६ सय ५३ परिवारले नै निजी आवास पुनर्निर्माण सकेका छन् । राष्ट्रियसभाका अध्यक्ष गणेशप्रसाद तिमिल्सिनाको प्रमुख आतिथ्यमा सुनकोसी–३ साविकको कालिका गाविसलाई सतप्रतिशत निजी आवास पुनर्निर्माण सक्ने देशकै पहिलो वडा घोषणा गरिएको हो ।
कारितास नेपालको भूकम्प पुनःनिर्माण परियोजनाअन्तर्गत राष्ट्रिय पुनःनिर्माण प्राधिकरणसँगको समन्वयमा यहाँका ६५३ घर निर्माण गरिएको हो । जसका लागि ५५ करोड २० लाख लगानी भएको छ । कारितास नेपालले सिन्धुपाल्चोकका विभिन्न वडामा ४ हजार ८ सय २५ घर निर्माणको जिम्मा लिएकामा ४ हजार ९ घर निर्माण सकेको छ । जसमध्ये सम्पूर्ण पुनर्निर्माण सकिएको सुनकोसी–३ पहिलो वडा हो ।
गैर–सरकारी संस्थाको सहयोग सही परिचालन, स्थानीय तहको समन्वय र टहरोको दैनिकीबाट वाक्कदिक्क भएका स्थानीयको सक्रियताका कारण यहाँ पुनर्निर्माणले गति लिएको हो । धेरै गैर–सरकारी संस्थाले पुनर्निर्माणमा आफ्नो स्वार्थ घुसाउँदा ‘बद्नाम’ भइरहेका बेला यहाँ भने समन्वयात्मक सहकार्यले सकारात्मक नतिजा दिएको छ ।
गैर–सरकारी संस्थाले घर बनाउने पैसासहित तालिम दिएपछि पुननिर्माणका सक्रिय भएका स्थानीयले करिब पाँच लाख खर्चिएर आवास निर्माण गरेका हुन् । प्राविधिकका अनुसार हेर्दा पनि चिटिक्क देखिने यस्ता भूकम्प प्रतिरोधी घर न्यूनतम् २२ दिनमै तयार हुन्छ । लामो समयसम्म टहरामा जीवन गुजारेको स्थानीय अहिले खुसी छन् ।
भूकम्पबाट धेरै क्षति ब्यहोरेको सिन्धुपाल्चोकमा पुनर्निर्माण तीव्र छ । राष्ट्रिय पुनर्निर्माण प्राधिकरणको जिल्ला आयोजना कार्यान्वयन इकाइका अनुसार सिन्धुपाल्चोकका ८८ हजार लाभग्राही परिवारमध्ये ५५ हजार बढीले घर बनाइसकेका छन् ।
-न्यूज२४
