तितोपाटी – मलेशियामा विषक्त मदिराका कारण ज्यान गुमाएका ६ जनाको शव नेपाल ल्याइएको छ । शुक्रबार रुपन्देहीको मसिना ६ का रामकुमार यादवको र शनिबार मध्यान्ह सर्लाहीका शेरबहादुर ठकुरीको शव नेपाल ल्याइएको वैदेशिक रोजगार प्रवर्द्धनबोर्डले जनाएको छ। सर्लाहीकै आइत सिंह गोले र नवलपरासीको देउरालीका दुर्गासिंह रानाको शव बिहीबार नेपाल ल्याइएको थियो। यस्तै सुनसरीका संजय उराव र इलामका बलबहादुर कुलुङको शव पनि नेपाल ल्याइसकिएको भए पनि परिवारले बोर्डमा सम्पर्क नगरेको प्रवर्द्धनबोर्डले जनाएको छ ।
विषक्त रक्सी पिउदा १० जना नेपाली कामदारको मलेसियामा ज्यान गएको थियो भने दुईको उपचार चलिरहेको छ । बोर्डका अनुसार भिमबहादुर घलेको शव आइतबार नेपाल ल्याउने तयारी छ । त्यसैगरी बिशाल बुढाथोकीको १६ गते, सुकुवल घिसिङको १७ गते र बिमल कार्कीको शव १८ गते नेपाल ल्याउने तयारी रहेको जानकारी दिएका छन् । विदेशमा मृत्यु भएका नेपाली नागरिकको शव सरकारले निःशुल्क घरसम्म पुयाइदिने भएकाले ढुवानी सेवाका लागि सम्पर्क गर्न वैदेशिक रोजगार प्रवर्द्धनबोर्डले परिवारलाई अनुरोध गरेको छ ।
मलेशियामा बिषक्त मदिराको सेवनले १० नेपाली सहित २३ आप्रवासी कामदारको मृत्यु भएपछि त्यहाँको स्वास्थ सेवा बिभागले मदिरा बिक्रीवितरण केन्द्रको निरीक्षण सहित हजारौं बोतल मदिरा नियन्त्रणमा लियर अनुसन्धान सुरु गरेको थियो ।
