तितोपाटी प्रमुख प्रतिपक्षी दल नेपाली कांग्रेसले संसद बैठक अरुद्ध पार्ने चेतावनी दिएपछि प्रतिनिधिसभाको बैठक साउन ११ गतेसम्मका लागि स्थगित भएको छ । कांग्रेसले संसद अवरोध जारी राख्ने चेतावनी दिएपछि सभामुख कृष्णबहादुर महराले बैठक नै एक हप्तापछि सारेका हुन् ।
डा. गोविन्द केसीको जीवन रक्षा र उनले उठाएका विषयलाई सममावेश गर्दै विधेयक ल्याउनुपर्ने माग गर्दै कांग्रेसले असार ३१ देखि संसद बैठक अवरुद्ध पार्दै आएको छ ।
बिहीबार राष्ट्रिय चिकित्सा शिक्षा विधेयकलाई कार्यसूचीबाट हटाएर सभामुख महराले बैठक चलाउने प्रयास गरे पनि विपक्षी कांग्रेस सहमति नहुँदा सूचना टाँसेर बैठक सारेका हुन् ।
सरकारले ल्याएको राष्ट्रिय चिकित्सा शिक्षा विधेयकप्रति कांग्रेसले असहमति जनाउँदै आएको छ । उसले यसअघि जारी भएको अध्यादेशअनुसार विधेयक ल्याउनु पर्ने माग गरेको छ ।
राजपा र नयाँ शक्तिसँग कांग्रेसको छलफल
गोविन्द केसीको मागप्रति समान धारणा बनाउन कांग्रेसले राजपा नेपाल र नयाँ शक्तिसँग प्रस्ताव गरेको छ । संसद भवन नयाँ बानेश्वरमा बसेको तीन दलको बैठकमा कांग्रेस सभापति शेरबहादुर देउवाले सरकारप्रति आक्रामण रुपमा प्रस्तुत हुन राजपा र नयाँ शक्तिलाई आग्रह गरेका हुन् ।
छलफलमा सभापति देउवा, नयाँ शक्तिका संयोजक डा. बाबुराम भट्टराई र राजपा अध्यक्ष मण्डलका सदस्य राजेन्द्र महतो सहभागी थिए । उनीहरुले पार्टीमा छलफल गरेर जवाफ दिने जानकारी दिए । कांग्रेसले सरकारविरुद्ध संसद र सडकमा आन्दोलनको घोषणा गरेको छ ।
