तितोपाटी – हेर्दाहेर्दै बलिउडकी ‘मोस्ट डिमान्डिङ’ अभिनेत्री बनेकी छिन् दिशा पटानी । ठूला-ठूला निर्माता निर्देशकहरु अफर बोकेर उनीकहाँ लाइन लागिरहेका छन् । 
दिशाले अहिलेसम्म दुईवटा मात्र बलिउड फिल्म खेलेकी छन् । र, ती दुवै फिल्म हिट भएका छन् । उनको पहिलो फिल्म थियो क्रिकेटर महेन्द्र सिंह धोनीको बायोपिक । जसमा उनले धोनीकी पत्नी साक्षीको भूमिका निभाएकी थिइन् । यही फिल्मबाट उनी नोटिसमा आइन् ।
हालै उनको दोस्रो फिल्म बागी २ प्रदर्शनमा आयो र धमाकेदार कमाई गर्यो । यस फिल्ममा दिशा आफ्ना रियल लाइफ ब्वाइफ्राइन्ड टाइगर श्राफसँग देखिएकी छन् । बागी २ को सफलतापछि दिशाको चर्चा चुलिएको हो ।
अहिले उनी सलमान खानको फिल्म ‘भारत’ मा व्यस्त छिन् । यस फिल्मका लागि जमेर मिहिनेत पनि गरिरहेकी छन् । साथै ऋतिक रोशनको जोडी भएर अर्को फिल्म खेल्ने पनि तय भएको छ ।
यसरी हातमा दुई प्रोजेक्ट भइसकेपछि तत्काल उनले अर्को अफर स्वीकार्ने सम्भावना छैन । यस्तोमा उनले सुपरस्टार अक्षय कुमारको जोडी बन्ने प्रस्तावलाई समेत नकार्नु परेको छ । उनलाई ‘हाउसफुल ४’ का लागि यो अफर आएको थियो । समय नभएको भन्दै उनले अफर अस्वीकार गरिन् ।
कुनै बेला बलिउडमा फिल्म पाउनका लागि निर्माता-निर्देशकको दैलो चहार्ने दिशा पटानीको करिअरले यति चाँडो यो उचाई लेला भन्ने सायदै कसैलाई लागेको थियो । उनी आफ्नो ग्ल्यामरस र सेक्सी छविका लागि पनि चर्चित छिन् ।
