चन्द्र बिश्वकर्मा, तितोपाटी – मुस्लिम समुदायको रमजान अर्थात् एकमहिने व्रत रोजा आज बाट सकिएको छ ।
ईद पर्व १४३९ कुवेत लगायत अन्य गल्फ राष्ट्रमा भोलि मनाउने भएको छ । ईद इस्लाम धर्मावलम्बीहरूको महान् पर्व हो । यसलाई ईद उल फित्र पनि भनिन्छ ।
यो पर्व इस्लामिक मुलुकहरू लगायत नेपाल, भारत बङ्गलादेश, अफ्गानिस्थान र श्रीलंकामा हर्षोल्लासका साथ मनाइन्छ । अरेबिक पात्रो हिजरी संवत्को रमजानल मुबारक महिनाभर रोजा, व्रत बसिसकेपछि रोजाको अन्तिम दिन मुसलमानले महान चाड इर्द उल फित्र मनाउँछन् ।
भोलि इदको दिन इस्लाम धर्मावलम्बीहरू बिहानै उठ्छन् । नुहाइ–धुवाई गरी चोखो बनेर सेवई खाएर नमाज पढ्ने चलन छ। ईदमा मुसलमानहरू सफा, राम्रा कपडा र अत्तर लगाएर इदगाह वा मस्जिदमा गएर इदको नमाज पढ्छन् । ईदमा आफन्त र छिमेकीहरूलाई पनि बोलाएर खुवाउने, भेटघाट गर्ने छ्न । ठूलाले सानालाई आशीर्वादसँगै दक्षिणा दिने पनि प्रचलन छ ।
‘ईद’को शाब्दिक अर्थ नै ‘खुसी’ भनी कुरानमा लेखिएको छ । रोजा व्रतले तन, मन शुद्ध गराउने मानिन्छ ।
ईदका अवसरमा गरिब लाई पैसा, खानेकुरा, कपडा दान गर्छन । विशेषगरी रोजा अवधिभर भोकै बसेर सांसारिक कुराबाट टाढा बस्छन्, । रोजा अवधिभरको अभ्यासले पुण्य कमाएको, पाप पखालिएको, ईष्र्या झुट, लोभबाट टाढा बस्न पाएको अवसरमा इद मनाउने चलन छ । इद पर्वको नमाज पढ्न जादा पहिले गएको बाटो बाट नफर्की अर्को बाटोबाट फर्किने चलन पनि रहेको छ ।
कुवेत सिटिको मालियामा रहेको मस्जिद युसुप अल- अद्सनीमा अरबिक भाषा नजान्नेका लागि हिन्दी भाषामा भोलि बिहान ६ बजे इदको नमाज सुरु हुने आइपिसि नेपाली भाषाका शिक्षक मोहम्मद इब्राहिमले तितोपाटी लाई जानकारी गराउनु भएको छ ।
