नयाँ दिल्ली, ५ नोभेम्बर। भारतको रक्षा अनुसन्धान तथा विकास सङ्गठन (डीआरडीओ) ले स्वदेशमै विकास गरेको ‘प्रलय’ अर्ध-ब्यालिस्टिक सतहबाट सतहमा प्रहार गर्ने क्षेप्यास्त्रको सफल उडान परीक्षण गरेको छ। ओडिशाको समुद्री तटस्थित डा. एपीजे अब्दुल कलाम टापुबाट बिहीबार बिहान ११ बजेर १० मिनेटमा परीक्षण गरिएको रक्षा मन्त्रालयले जनाएको छ।
मन्त्रालयका अनुसार उक्त परीक्षण सेनाको प्रयोगकर्ता मूल्याङ्कन परीक्षणअन्तर्गत गरिएको थियो। चाँदीपुरस्थित एकीकृत परीक्षण केन्द्रका विभिन्न उपकरणबाट सङ्कलित तथ्याङ्कले परीक्षणका सबै निर्धारित उद्देश्य पूरा भएको पुष्टि गरेको छ। यस सफल परीक्षणसँगै प्रलय क्षेप्यास्त्रलाई भारतीय सशस्त्र सेनामा समावेश गर्ने प्रक्रिया नजिक पुगेको मन्त्रालयले जनाएको छ।
प्रलय क्षेप्यास्त्र हैदराबादस्थित रिसर्च सेन्टर इमारत तथा डीआरडीओका अन्य प्रयोगशालाहरूको सहकार्यमा विकास गरिएको हो। यसको उत्पादन विकास तथा उत्पादन साझेदार भारत डायनामिक्स लिमिटेडले गरेको छ। परीक्षणका क्रममा डीआरडीओका वरिष्ठ अधिकारी, रक्षा उद्योगका प्रतिनिधि तथा सशस्त्र सेनाका अधिकारीहरू उपस्थित थिए।
प्रलयलाई परम्परागत वारहेड बोक्न सक्ने क्षेप्यास्त्रका रूपमा विकास गरिएको छ। यसको प्रहार दूरी करिब १५० देखि ५०० किलोमिटरसम्म रहेको र यसले ५०० देखि १,००० किलोग्रामसम्मको भार बोक्न सक्ने विभिन्न समाचार स्रोतहरूले उल्लेख गरेका छन्। यसको आधुनिक मार्गनिर्देशन तथा नेभिगेसन प्रणालीले उच्च सटीकता प्रदान गर्ने बताइएको छ।
भारतका रक्षामन्त्री राजनाथ सिंहले सफल परीक्षणमा संलग्न डीआरडीओ, सशस्त्र सेना र उद्योग साझेदारहरूलाई बधाई दिँदै प्रलयले भारतको स्वदेशी रक्षा प्रविधि, सैन्य तयारी र उदीयमान सुरक्षा चुनौतीको सामना गर्ने क्षमतामा थप वृद्धि गर्ने बताएका छन्।
यो परीक्षण भारतको स्वदेशी रक्षा उत्पादन तथा सैन्य आत्मनिर्भरता अभियानका लागि महत्त्वपूर्ण उपलब्धिका रूपमा हेरिएको छ।
