मलेसिया रोजगारीका लागि २५ वटा म्यानपावर कम्पनीलाई मात्रै श्रमिक पठाउने अधिकार दिइएको विषयमा सरकारले छानबिन सुरु गरेको छ।
युवा, श्रम तथा रोजगार मन्त्रालयले ती कम्पनीहरूको स्थापनाकालदेखि हालसम्मको कारोबार र मलेसिया पठाउने अधिकार कसरी प्राप्त भयो भन्ने विषयमा अनुसन्धान गर्न वैदेशिक रोजगार विभागलाई निर्देशन दिएको छ।
विभागले ती कम्पनीहरूले वैदेशिक रोजगारीमा सिन्डिकेट (एकाधिकार) कायम गर्न खोजेको भन्दै कारबाही प्रक्रिया अगाडि बढाएको जनाएको छ। यसअघि कम्पनीहरूलाई स्पष्टीकरण सोधिएको भए पनि सरकारी निर्देशनको अवज्ञा गरेको आरोप लगाइएको छ।
मलेसियाले पहिले २५ कम्पनीमार्फत मात्र नेपाली श्रमिक लैजाने सूची सार्वजनिक गरेपछि चौतर्फी विरोध भएको थियो। त्यसपछि सरकारले मलेसिया जाने श्रमिकको पूर्वस्वीकृति तथा प्रमाणीकरण प्रक्रिया नै रोकिएको थियो।
